ഗോവയിലെ പ്രമുഖ യുവ കോൺഗ്രസ് നേതാവും ഫിസിയോതെറാപ്പിസ്റ്റുമായ ഡോ. കേതൻ ഭടികർ (38) പാമ്പുകടിയേറ്റ് അന്തരിച്ചു. ഗോവ-കർണാടക അതിർത്തിയിലെ കർമൽ ഘട്ടിൽ വെച്ചാണ് ഇദ്ദേഹത്തിന് പാമ്പുകടിയേറ്റത്. വ്യാഴാഴ്ച രാത്രി കർണാടകയിലെ ദണ്ഡേലി ഗ്രാമത്തിലേക്ക് യാത്ര ചെയ്യുന്നതിനിടെ വാഹനം നിർത്തി പുറത്തിറങ്ങിയപ്പോഴായിരുന്നു അപകടം.

പാമ്പുകടിയേറ്റ ഉടൻ തന്നെ അദ്ദേഹത്തെ ഗോവയിലെ ധർബന്ദോരയിലുള്ള പ്രാഥമികാരോഗ്യ കേന്ദ്രത്തിൽ എത്തിച്ചെങ്കിലും ജീവൻ രക്ഷിക്കാനായില്ല. പോണ്ട മണ്ഡലത്തിലെ കോൺഗ്രസിന്റെ സജീവ സാന്നിധ്യമായിരുന്ന കേതൻ, അവിടെ സ്ഥാനാർത്ഥിയായി മത്സരിച്ചിരുന്നു. കോടതി ഉത്തരവിനെത്തുടർന്ന് ഈ മണ്ഡലത്തിലെ ഉപതെരഞ്ഞെടുപ്പ് റദ്ദാക്കിയ സാഹചര്യത്തിൽ, ഹൈക്കോടതി വിധിക്കെതിരെ അദ്ദേഹം സുപ്രീം കോടതിയെ സമീപിച്ചിരുന്നു. ഈ നിയമപോരാട്ടം തുടരുന്നതിനിടെയാണ് അപ്രതീക്ഷിത വിയോഗം.

കേതൻ ഭടികറുടെ നിര്യാണത്തിൽ ഗോവ പ്രതിപക്ഷ നേതാവ് യൂറി അലേമാവോ ആദരാഞ്ജലികൾ അർപ്പിച്ചു. പൊതുസേവനത്തോടുള്ള അദ്ദേഹത്തിന്റെ അചഞ്ചലമായ പ്രതിബദ്ധത എന്നും ഓർമ്മിക്കപ്പെടുമെന്നും ഈ ദുഃഖസമയത്ത് കുടുംബത്തിന്റെ വേദനയിൽ പങ്കുചേരുന്നതായും അദ്ദേഹം പറഞ്ഞു. ഗോവ പ്രദേശ് കോൺഗ്രസ് കമ്മിറ്റിയും നേതാവിന്റെ വിയോഗത്തിൽ അനുശോചനം രേഖപ്പെടുത്തി.