കൗമാരക്കാരായ ഉപഭോക്താക്കളുടെ സുരക്ഷ ഉറപ്പാക്കുന്നതിനായി ഇൻസ്റ്റഗ്രാമിൽ വിപ്ലവകരമായ മാറ്റങ്ങളുമായി മെറ്റ. 18 വയസ്സിൽ താഴെയുള്ള എല്ലാ ഉപഭോക്താക്കൾക്കും ഇനി മുതൽ '13+ കണ്ടന്റ് എക്സ്പീരിയൻസ്' (13+ content experience) എന്ന കർശന സുരക്ഷാ ക്രമീകരണം ഡിഫോൾട്ടായി ലഭ്യമാകും. കുട്ടികളുടെ പ്രായം തിരിച്ചറിയുന്നതിനും അനുചിതമായ ഉള്ളടക്കങ്ങൾ തരംതിരിക്കുന്നതിനും അത്യാധുനിക നിർമ്മിത ബുദ്ധി (AI) സംവിധാനമാണ് മെറ്റ ഒരുക്കിയിരിക്കുന്നത്.

18 വയസ്സിൽ താഴെയുള്ളവരുടെ അക്കൗണ്ടുകളിൽ സുരക്ഷാ മാനദണ്ഡങ്ങൾ ഇനി മുതൽ മെറ്റ തന്നെ നേരിട്ട് നിശ്ചയിക്കും. സിനിമകളിലെ പി.ജി-13 റേറ്റിങ്ങിന് സമാനമായ ഉള്ളടക്കങ്ങൾ മാത്രമേ കൗമാരക്കാർക്ക് ഇനി കാണാൻ സാധിക്കൂ. സുരക്ഷാ ക്രമീകരണങ്ങളിൽ എന്തെങ്കിലും മാറ്റം വരുത്തണമെങ്കിൽ മാതാപിതാക്കളുടെ പ്രത്യേക അനുമതി നിർബന്ധമാക്കിയതാണ് ഈ ഫീച്ചറിന്റെ മറ്റൊരു സവിശേഷത.

കുട്ടികൾ എന്ത് കാണണമെന്ന് ഇനി മെറ്റ തീരുമാനിക്കും:

• അപകടകരമായ ഉള്ളടക്കങ്ങൾക്ക് വിലക്ക്: ലഹരി ഉപയോഗം, പരുക്കൻ ഭാഷാപ്രയോഗങ്ങൾ, അപകടകരമായ സാഹസിക പ്രകടനങ്ങൾ എന്നിവ അടങ്ങിയ പോസ്റ്റുകൾ കൗമാരക്കാരുടെ ഫീഡുകളിൽ നിന്ന് പൂർണ്ണമായും ഒഴിവാക്കും.
• എ.ഐ നിരീക്ഷണം: തെറ്റായ പ്രായം നൽകി അക്കൗണ്ട് തുടങ്ങുന്നവരെ കണ്ടെത്താൻ എ.ഐ സംവിധാനം സഹായിക്കും. സന്ദേശങ്ങൾ, സെർച്ച് റിസൾട്ടുകൾ എന്നിവയിലും ഈ കർശന പരിശോധന ബാധകമായിരിക്കും.
• മാതാപിതാക്കൾക്ക് കടിഞ്ഞാൺ: 'ലിമിറ്റഡ് കണ്ടന്റ്' (Limited Content) എന്ന ഫീച്ചറിലൂടെ കമന്റുകൾ നിയന്ത്രിക്കാനും കുട്ടികൾ കാണുന്ന ഉള്ളടക്കത്തിന് മേൽ നിരീക്ഷണം നടത്താനും മാതാപിതാക്കൾക്ക് സാധിക്കും.
• ശുപാർശകളിൽ നിയന്ത്രണം: റീൽസ്, എക്സ്പ്ലോർ വിഭാഗങ്ങളിൽ അനുചിതമായ വിഡിയോകൾ ശുപാർശ ചെയ്യുന്നത് കുറയ്ക്കും.