കൊച്ചിയിലെ വഴിയോര ഭക്ഷണശാലയിൽ ബീഫ് വിഭവങ്ങൾ വിൽക്കുന്നതിനെതിരെ സമൂഹമാധ്യമത്തിൽ കുറിപ്പ് പങ്കുവെച്ച രാജസ്ഥാൻ സ്വദേശി സഞ്ജയ് ശർമയ്ക്ക് രൂക്ഷമായ മറുപടിയുമായി മലയാളികൾ. കേരളത്തിൽ പരസ്യമായി ബീഫ് വിൽക്കുന്നത് കണ്ടപ്പോൾ ഹൃദയം തകർന്നു എന്നായിരുന്നു സഞ്ജയ് ശർമയുടെ ഫേസ്ബുക്ക് പോസ്റ്റ്. പ്രധാനമന്ത്രി നരേന്ദ്ര മോദിയും ഉത്തർപ്രദേശ് മുഖ്യമന്ത്രി യോഗി ആദിത്യനാഥും വിഷയത്തിൽ ഇടപെടണമെന്നും രാജ്യവ്യാപകമായി നടപടി സ്വീകരിക്കണമെന്നും അദ്ദേഹം ആവശ്യപ്പെട്ടിരുന്നു. പശുവിനെ പരിശുദ്ധമായി കാണുന്ന രാജ്യത്ത് ഇത്തരത്തിലുള്ള കാഴ്ചകൾ വേദനാജനകമാണെന്നും പോസ്റ്റിൽ പറയുന്നു.

സഞ്ജയ് ശർമയുടെ പോസ്റ്റ് വൈറലായതിന് പിന്നാലെ രസകരവും ശക്തവുമായ പ്രതികരണങ്ങളുമായി നിരവധി മലയാളികളാണ് കമന്റ് ബോക്സിൽ എത്തിയത്. കേരളത്തിൽ എന്ത് ഭക്ഷണം കഴിക്കണം എന്നത് ഓരോരുത്തരുടെയും വ്യക്തിപരമായ അവകാശമാണെന്നും മറ്റുള്ളവരുടെ ഭക്ഷണരീതികളിൽ കൈകടത്താൻ ആരെയും അനുവദിക്കില്ലെന്നും പലരും വ്യക്തമാക്കിക്കൊണ്ട് രംഗത്തെത്തി. ബീഫ് ഫ്രൈ, ബീഫ് റോസ്റ്റ്, ബീഫ് സ്റ്റ്യൂ, ബീഫ് കുരുമുളക് വരട്ടിയത്, ചില്ലി ബീഫ്, കപ്പയും ബീഫും, കപ്പ ബിരിയാണി തുടങ്ങി കേരളത്തിലെ വിവിധ രുചികരമായ ബീഫ് വിഭവങ്ങളുടെ പേരുകൾ നിരത്തിയാണ് പലരും മറുപടി നൽകിയത്. ചിലരാകട്ടെ രുചികരമായ ബീഫ് കറി തയ്യാറാക്കുന്നതിനുള്ള പാചകക്കുറിപ്പുകൾ (Recipes) തന്നെ കമന്റ് ബോക്സിൽ പങ്കുവെക്കുകയും ചെയ്തു. സ്വന്തം സംസ്ഥാനത്തെ കാര്യങ്ങൾ നോക്കിയ ശേഷം കേരളത്തിലെ ഭക്ഷണരീതികളെക്കുറിച്ച് അഭിപ്രായം പറഞ്ഞാൽ മതിയെന്നും വടക്കുകിഴക്കൻ സംസ്ഥാനങ്ങളിലും ഇത്തരം ഭക്ഷണശീലങ്ങളുണ്ടെന്നും ചിലർ ചൂണ്ടിക്കാണിച്ചു.

കഴിഞ്ഞ മാസം ഫോർട്ട് കൊച്ചിയിലെ കഫേയിൽ ബീഫ് വിളമ്പുന്നതിനെതിരെ വിഡിയോ പങ്കുവെച്ച 'ലിട്ടി ചോഖ' എന്ന സമൂഹമാധ്യമ അക്കൗണ്ടിന്റെ ഉടമ അമൃത് സിങ് ഡാരനെതിരെ മതവിദ്വേഷം വളർത്താൻ ശ്രമിച്ചതിന് പൊലീസ് കേസെടുത്തിരുന്നു. ഇതിന് പിന്നാലെയാണ് കൊച്ചിയിലെ ബീഫ് വിൽപ്പന ചൂണ്ടിക്കാണിച്ചുള്ള സഞ്ജയ് ശർമയുടെ പുതിയ പോസ്റ്റും വലിയ ചർച്ചയായിരിക്കുന്നത്. കേരളത്തിന്റെ ഭക്ഷണസ്വാതന്ത്ര്യത്തെ ചോദ്യം ചെയ്യാനുള്ള ഇത്തരം ശ്രമങ്ങളെ ശക്തമായ ഭാഷയിലാണ് സമൂഹമാധ്യമങ്ങൾ നേരിടുന്നത്.