സോഷ്യൽ മീഡിയയിൽ തരംഗമായി മാറിയ തന്റെ ‘പൂക്കി സിഎം’ റിയാക്ഷനും അതിന് പിന്നിലെ വൈറൽ ചിരിക്കുമുള്ള രഹസ്യം പരസ്യമാക്കി മുഖ്യമന്ത്രി വി.ഡി. സതീശൻ. വാഹന മോഡിഫിക്കേഷൻ നിയമവിധേയമാക്കുമോ എന്ന കാര്യത്തിൽ ഒരു യുവാവ് ഉന്നയിച്ച ചോദ്യത്തിന് മുഖ്യമന്ത്രി നൽകിയ ഭാവവ്യത്യാസങ്ങളും ചിരിയുമാണ് ഇപ്പോൾ ഇൻ്റർനെറ്റിൽ വലിയ രീതിയിൽ റീൽസുകളായും മീമുകളായും പ്രചരിക്കുന്നത്.

ചെറുപ്പക്കാർക്കിടയിൽ ഈ വീഡിയോ തരംഗമായതോടെയാണ് മുഖ്യമന്ത്രി തന്നെ നേരിട്ട് ഇതിന് പിന്നിലെ കഥ വിശദീകരിച്ച് രംഗത്തെത്തിയത്. ഒരു മാധ്യമപ്രവർത്തകനല്ല, മറിച്ച് വളരെ കൗതുകത്തോടെ മുന്നിലിരുന്ന ഒരു സാധാരണ പയ്യനാണ് തന്നോട് ആ ചോദ്യം ചോദിച്ചതെന്ന് വി.ഡി. സതീശൻ പറഞ്ഞു. അവനോട് തോന്നിയ പ്രത്യേക വാത്സല്യമാണ് ആ മറുപടിക്ക് പിന്നിലെന്നും അദ്ദേഹം കൂട്ടിച്ചേർത്തു.

'ഒരു പയ്യനാണ് അതെന്നോട് ചോദിച്ചത്. ഒരു വാത്സല്യം കൊണ്ട് കാണിച്ചതാണത്. അവന്‍റെ മുഖവും പെരുമാറ്റവുമൊക്കെ കണ്ടപ്പോള്‍ ഉള്ളിൽ ഒരു വാത്സല്യം തോന്നി. പേടിക്കണ്ടടാ, ശരിയാക്കാമെന്നുള്ള മട്ടില്‍ കാണിച്ചതാണ്. ചെറുപ്പക്കാര്‍ക്കിടയിലുള്ള ഒരു ആഗ്രഹമല്ലേ. പിന്നെ ഞാന്‍ പറഞ്ഞു, ഒരു വാക്കല്ലേ പറഞ്ഞത്, അത് ശരിയാക്കിയെടുക്കാമെന്ന്. നമ്മള്‍ മക്കളോടൊക്കെ കാണിക്കുന്നത് പോലെ കാണിച്ചതാണ്. ഇന്നലെ രാത്രി മോളാണ് എന്നെ വിഡിയോ കൊണ്ട് കാണിച്ചുതന്നത്,' വി.ഡി സതീശന്‍ പറഞ്ഞു.