എഐഎഫ്എഫ് ക്ലബ് ലൈസൻസ്; കേരള ബ്ലാസ്റ്റേഴ്സും മോഹൻ ബഗാനും ഉൾപ്പെടെ 7 ടീമുകളുടെ അപേക്ഷ നിരസിച്ചു
ഇന്ത്യൻ ഫുട്ബോൾ ആരാധകരെ അമ്പരപ്പിച്ചു കൊണ്ട് കേരള ബ്ലാസ്റ്റേഴ്സ്, മോഹൻ ബഗാൻ ഉൾപ്പെടെയുള്ള പ്രമുഖ 7 ക്ലബുകളുടെ ലൈസൻസ് അപേക്ഷ അഖിലേന്ത്യാ ഫുട്ബോൾ ഫെഡറേഷൻ (AIFF) നിരസിച്ചു. ക്ലബുകൾ സമർപ്പിച്ച രേഖകൾ പരിശോധിച്ച ശേഷം ഫെഡറേഷൻ പുറത്തുവിട്ട ആദ്യഘട്ട പട്ടികയിലാണ് പ്രമുഖ ടീമുകൾക്ക് തിരിച്ചടിയേറ്റത്.
ദേശീയ ഫുട്ബോൾ ടൂർണമെന്റുകളിൽ പങ്കെടുക്കണമെങ്കിൽ ക്ലബ് ലൈസൻസ് നിർബന്ധമാണ്. എന്നാൽ, നിലവിൽ അപേക്ഷ നിരസിക്കപ്പെട്ട ക്ലബുകൾക്ക് ഈ തീരുമാനത്തിനെതിരെ അപ്പീൽ നൽകാനും, ആവശ്യമായ മാനദണ്ഡങ്ങൾ പൂർത്തിയാക്കാൻ ഫെഡറേഷനിൽ നിന്ന് കൂടുതൽ സമയം തേടാനും അവസരമുണ്ട്.
ലൈസൻസ് ലഭിക്കാത്ത ക്ലബുകൾ:
- കേരള ബ്ലാസ്റ്റേഴ്സ് എഫ്സി
- മോഹൻ ബഗാൻ സൂപ്പർ ജയന്റ്സ്
- ഒഡീഷ എഫ്സി
- ചെന്നൈയിൻ എഫ്സി
- മൊഹമ്മദൻസ് എസ്സി
- ഇന്റർ കാശി
- സ്പോർട്ടിങ് ഡൽഹി
ലൈസൻസ് സ്വന്തമാക്കിയവർ:
മുംബൈ സിറ്റി എഫ്സി, എഫ്സി ഗോവ, ബെംഗളൂരു എഫ്സി, ഈസ്റ്റ് ബംഗാൾ, നോർത്ത് ഈസ്റ്റ് യുണൈറ്റഡ്, പഞ്ചാബ് എഫ്സി, ജംഷെഡ്പൂർ എഫ്സി എന്നീ ക്ലബുകളുടെ അപേക്ഷകൾ എഐഎഫ്എഫ് അംഗീകരിക്കുകയും ലൈസൻസ് അനുവദിക്കുകയും ചെയ്തിട്ടുണ്ട്. അപ്പീൽ കാലയളവിനുള്ളിൽ വീഴ്ചകൾ പരിഹരിച്ച് ലൈസൻസ് സ്വന്തമാക്കാനാകും എന്ന പ്രതീക്ഷയിലാണ് ബ്ലാസ്റ്റേഴ്സ് ഉൾപ്പെടെയുള്ള ക്ലബുകൾ.