സ്പാനിഷ് സൂപ്പർ കപ്പിൽ വീണ്ടും ബാഴ്‌സലോണയുടെ കിരീടധാരണം. ആവേശകരമായ എൽ ക്ലാസിക്കോ ഫൈനലിൽ ബദ്ധവൈരികളായ റയൽ മാഡ്രിഡിനെ 2നെതിരെ 3 ഗോളുകൾക്ക് തകർത്ത് ബാഴ്‌സലോണ കിരീടം നിലനിർത്തി. കഴിഞ്ഞ സീസണിലെ ഫൈനലിന്റെ ആവർത്തനമെന്നോണം ഇത്തവണയും റയലിനെ വീഴ്ത്തിയാണ് കറ്റാലൻ പട കിരീടത്തിൽ മുത്തമിട്ടത്.

മത്സരത്തിൽ ഇരട്ട ഗോളുകൾ നേടിയ റഫീഞ്ഞയാണ് ബാഴ്‌സയുടെ വിജയശില്പി. റോബർട്ട് ലെവൻഡോസ്‌കിയും ടീമിനായി ഒരു ഗോൾ നേടി. റയലിനായി വിനിഷ്യസ് ജൂനിയർ, ഗോൺസാലോ ഗാർഷ്യ എന്നിവർ ലക്ഷ്യം കണ്ടു. ആദ്യ പകുതിയുടെ ഇഞ്ചുറി ടൈമിൽ പിറന്ന തുടർച്ചയായ മൂന്ന് ഗോളുകൾ മത്സരത്തിന്റെ ആവേശം വാനോളമുയർത്തി. പകുതി സമയത്ത് ഇരുടീമുകളും 2-2 എന്ന നിലയിലായിരുന്നു.

കളിയുടെ 73-ാം മിനിറ്റിൽ റഫീഞ്ഞ നേടിയ രണ്ടാമത്തെ ഗോളാണ് ബാഴ്‌സലോണയ്ക്ക് വിജയം ഉറപ്പിച്ചു നൽകിയത്. മത്സരത്തിന്റെ അവസാന നിമിഷങ്ങളിൽ ഫ്രങ്കി ഡി യോങ് ചുവപ്പ് കാർഡ് കണ്ട് പുറത്തായതിനെത്തുടർന്ന് ബാഴ്‌സ 10 പേരായി ചുരുങ്ങിയെങ്കിലും റയലിന് തിരിച്ചടിക്കാൻ സാധിച്ചില്ല. ഉജ്ജ്വലമായ പോരാട്ടത്തിനൊടുവിൽ സ്പാനിഷ് സൂപ്പർ കപ്പ് കിരീടം ബാഴ്‌സലോണ കാത്തുസൂക്ഷിച്ചു.