ദോഹയിൽ പുരോഗമിക്കുന്ന നാലാമത് ജി.സി.സി ഗെയിംസിൽ ഷൂട്ടിംഗ് മത്സരത്തിൽ കുവൈത്തിന് തിളക്കമാർന്ന വിജയം. പുരുഷ വിഭാഗം സ്കീറ്റ് ഷൂട്ടിംഗ് ടീം ഇനത്തിലാണ് കുവൈത്ത് സ്വർണ്ണ മെഡൽ കരസ്ഥമാക്കിയത്. സൗദ് അൽ കന്ദരി, മുഹമ്മദ് അൽ ദൈഹാനി, അബ്ദുൽ അസീസ് അൽ സൗദ് എന്നിവരടങ്ങുന്ന കുവൈത്ത് സംഘമാണ് ഒന്നാം സ്ഥാനത്തെത്തിയത്.

വാശിയേറിയ മത്സരത്തിൽ സൗദി അറേബ്യ രണ്ടാം സ്ഥാനവും വെള്ളിയും നേടി. ആതിഥേയരായ ഖത്തറിനാണ് ഈ ഇനത്തിൽ മൂന്നാം സ്ഥാനവും വെങ്കല മെഡലും ലഭിച്ചത്. ഷൂട്ടിംഗ് ഉൾപ്പെടെ വിവിധ കായിക ഇനങ്ങളിൽ ഗൾഫ് രാജ്യങ്ങൾ തമ്മിലുള്ള കടുത്ത പോരാട്ടത്തിനാണ് ദോഹ സാക്ഷ്യം വഹിക്കുന്നത്.

ആറ് ഗൾഫ് രാജ്യങ്ങളിൽ നിന്നുള്ള ഏകദേശം 1,400 അത്‌ലറ്റുകളാണ് ഈ വർഷത്തെ ഗെയിംസിൽ മാറ്റുരയ്ക്കുന്നത്. കായിക രംഗത്തെ ഗൾഫ് രാജ്യങ്ങളുടെ കൂട്ടായ്മയും കരുത്തും വിളിച്ചോതുന്ന ജി.സി.സി ഗെയിംസ് ഈ മാസം 22 വരെ തുടരും. വരും ദിവസങ്ങളിലും കൂടുതൽ ഇനങ്ങളിൽ മെഡൽ പോരാട്ടങ്ങൾ നടക്കും.