സിംബാബ്‌വെയ്‌ക്കെതിരായ വനിതാ ട്വന്റി20 പരമ്പര ഇന്ത്യ തൂത്തുവാരി. റായ്പുരില്‍ നടന്ന ആവേശകരമായ മൂന്നാം മത്സരത്തിൽ 92 റണ്‍സിനാണ് ഇന്ത്യൻ സംഘത്തിന്റെ തകർപ്പൻ വിജയം. മുൻ ക്യാപ്റ്റൻ ഹർമൻപ്രീത് കൗറിന്റെ ബാറ്റിംഗ് വെടിക്കെട്ടാണ് ഇന്ത്യൻ വിജയത്തിന് അടിത്തറ പാകിയത്. വെറും 41 പന്തിൽ പുറത്താകാതെ 91 റൺസ് വാരിയ ഹർമൻപ്രീത് തന്നെയാണ് കളിയിലെ താരവും. പരമ്പരയിലാകെ 128 റണ്‍സ് നേടിയ വൈസ് ക്യാപ്റ്റന്‍ ഷെഫാലി വര്‍മയാണ് 'പ്ലെയര്‍ ഓഫ് ദ് സീരീസ്' പുരസ്കാരം സ്വന്തമാക്കിയത്.

ടോസ് നേടി ബാറ്റിങ് തിരഞ്ഞെടുത്ത ഇന്ത്യക്കായി പതിവ് ഓപ്പണർ സ്മൃതി മന്ഥനയ്ക്ക് പകരം അനുഷ്‌ക ശര്‍മയാണ് ഷെഫാലിക്കൊപ്പം ക്രീസിലെത്തിയത്. മികച്ച തുടക്കം നൽകിയ ഇരുവരും ചേർന്ന് അഞ്ചോവറില്‍ തന്നെ സ്‌കോര്‍ 50 കടത്തി. തകർപ്പൻ പ്രകടനം പുറത്തെടുത്ത ഷെഫാലി 37 പന്തിൽ 5 സിക്സും 6 ഫോറും ഉൾപ്പെടെ 69 റണ്‍സെടുത്തു. അനുഷ്‌ക ശർമ (28), നിക്കി പ്രസാദ് (9) എന്നിവർ പെട്ടെന്ന് പുറത്തായെങ്കിലും ക്രീസിലുറച്ച ഹർമൻപ്രീത് കൗർ സിംബാബ്‌വെ ബോളർമാരെ തലങ്ങും വിലങ്ങും പ്രഹരിച്ചു. സിബന്ദയുടെ ഓവറില് മൂന്ന് ബൗണ്ടറികള്‍ പായിച്ചാണ് താരം കരിയറിലെ 19-ാം അര്‍ധ സെഞ്ച്വറിയിലെത്തിയത്. ഒടുവിൽ 20 ഓവറില്‍ ഏഴുവിക്കറ്റ് നഷ്ടത്തിൽ ഇന്ത്യ 216 റണ്‍സിന്റെ കൂറ്റൻ ടേർഗെറ്റ് ഉയർത്തി.

മറുപടി ബാറ്റിംഗിനിറങ്ങിയ സിംബാബ്‌വെയ്ക്ക് ആദ്യ പന്തിൽ തന്നെ ഓപ്പണർ കെലിസ് എന്‍ഡ്‌ലോവുവിന്റെ വിക്കറ്റ് നഷ്ടമായി. തുടർച്ചയായ ഇടവേളകളിൽ വിക്കറ്റുകൾ വീണതോടെ സന്ദർശകരുടെ ഇന്നിങ്‌സ് 20 ഓവറില്‍ ഏഴുവിക്കറ്റിന് 124 റണ്‍സില്‍ അവസാനിച്ചു. ഇന്ത്യക്കായി ബോളിംഗിൽ തിളങ്ങിയ നന്ദനി ശര്‍മ നാലോവറില്‍ 18 റണ്‍സ് മാത്രം വഴങ്ങി മൂന്ന് നിർണായക വിക്കറ്റുകൾ വീഴ്ത്തി. ക്രാന്തി ഗൗഡ്, അരുന്ധതി റെഡ്ഡി, ദീപ്തി ശര്‍മ, നിക്കി പ്രസാദ് എന്നിവര്‍ ഓരോ വിക്കറ്റ് വീതവും സ്വന്തമാക്കി. വിജയത്തോടെ മൂന്ന് മത്സരങ്ങളടങ്ങിയ പരമ്പര ഇന്ത്യ 3-0ത്തിന് സ്വന്തമാക്കി.