ആഫ്രിക്കൻ കരുത്തരായ കോംഗോക്കെതിരെ ഒരു ഗോളിന് പിന്നിൽ നിന്ന ശേഷം ക്യാപ്റ്റൻ ഹാരി കെയ്‌ന്റെ ഇരട്ട ഗോൾ മികവിൽ ഇംഗ്ലണ്ട് ലോകകപ്പ് പ്രീക്വാർട്ടറിലേക്ക് മുന്നേറി. ഒന്നിനെതിരെ രണ്ട് ഗോളുകൾക്കായിരുന്നു മുൻ ചാമ്പ്യന്മാരുടെ നാടകീയ വിജയം. മത്സരത്തിന്റെ ഏഴാം മിനിറ്റിൽ ബ്രയാൻ സിപംഗയിലൂടെ കോംഗോയാണ് ആദ്യം ലീഡെടുത്തത്. എന്നാൽ 75, 86 മിനിറ്റുകളിൽ ഗോളുകൾ നേടി ഹാരി കെയ്ൻ ഇംഗ്ലണ്ടിന്റെ രക്ഷകനാവുകയായിരുന്നു.

മത്സരത്തിന്റെ തുടക്കം മുതൽ ഇംഗ്ലണ്ടിനെ വിറപ്പിക്കുന്ന പ്രകടനമാണ് കോംഗോ പുറത്തെടുത്തത്. ഏഴാം മിനിറ്റിൽ തന്നെ ഇടതുവിങ്ങിലൂടെ കുതിച്ചെത്തിയ സിംപെംഗ ഇംഗ്ലീഷ് ഗോൾകീപ്പർ ജോർദാൻ പിക്‌ഫോർഡിനെ കാഴ്ചക്കാരനാക്കി പന്ത് വലയിലെത്തിച്ചു. തുടർന്ന് സമനിലയ്ക്കായി ഇംഗ്ലണ്ട് നിരന്തരം ആക്രമണങ്ങൾ അഴിച്ചുവിട്ടെങ്കിലും മികച്ച സേവുകളുമായി കോംഗോ ഗോൾകീപ്പർ ലയണൽ എംപാസിയും പ്രതിരോധത്തിൽ ആരോൺ വാൻ ബിസേക്കയും ഉറച്ചുനിന്നതോടെ ഒന്നാം പകുതിയിൽ കോംഗോ ലീഡ് നിലനിർത്തി.

രണ്ടാം പകുതിയിലും ഇംഗ്ലണ്ട് ആക്രമണം തുടർന്നതോടെ 75-ാം മിനിറ്റിൽ അവർ ലക്ഷ്യം കണ്ടു. ആന്റണി ഗോർഡൻ നൽകിയ ക്രോസ് മനോഹരമായൊരു ഹെഡ്ഡറിലൂടെ ഹാരി കെയ്ൻ വലയിലെത്തിക്കുകയായിരുന്നു. തുടർന്ന് 86-ാം മിനിറ്റിൽ ഗോർഡനിൽ നിന്ന് തന്നെ പന്ത് സ്വീകരിച്ച് മുന്നേറിയ കെയ്ൻ ഉഗ്രനൊരു റോക്കറ്റ് ഷോട്ടിലൂടെ ഇംഗ്ലണ്ടിന്റെ വിജയഗോളും സ്വന്തമാക്കി.