സിഡ്നിയില് നാളെ ഇന്ത്യ-ഓസ്ട്രേലിയ മൂന്നാം ഏകദിനം
ഓസ്ട്രേലിയക്കെതിരായ ഏകദിന പരമ്പര കൈവിട്ടതിന്റെ നിരാശയിലാണ് ഇന്ത്യന് ടീം. വിരാട് കോലി തുടര്ച്ചയായി പൂജ്യത്തിന് മടങ്ങിയതാണ് ആരാധകരെ ഏറെ വേദനിപ്പിച്ചത്. ഡ്രസിംഗ് റൂമിലേക്കുള്ള കോലിയുടെ വൈകാരിക മടങ്ങിപ്പോക്ക് വിടവാങ്ങല് ഊഹാപോഹങ്ങള്ക്കും വഴിവച്ചു. ഒന്നരപതിറ്റാണ്ടിലേറേ നീണ്ട ഐതിഹാസിക കരിയറില് ഇതാദ്യത്തെ സംഭവം. തുടര്ച്ചയായ രണ്ട് ഏകദിന മത്സരത്തില് കിംഗ് കോലി സംപൂജ്യനായി.
പെര്ത്തില് എട്ടു പന്തു നേരിട്ട കോലി, അഡലെയ്ഡില് നാലാം പന്തില് മുട്ടുമടക്കി. തലകുനിച്ചു നടന്ന കോലിയെ ഹര്ഷാരവത്തോടെ യാത്രയാക്കി കാണികള്. പിന്നാലെ കയ്യിലെ ഗ്ലൗസ് ഉയര്ത്തി കാണിച്ച് താരം. ഡ്രസിംഗ് റൂമിലേക്കുള്ള കോലിയുടെ ഈ വൈകാരിക വിടവാങ്ങല് ക്രിക്കറ്റ് ലോകത്ത് സജീവ ചര്ച്ചയായി. കോലി വിരമിക്കുമെന്ന് അഭ്യൂഹങ്ങള് പ്രചരിച്ചു. ഒരുപക്ഷേ തന്റെ പ്രിയപ്പെട്ട ഗ്രൗണ്ടിലെ അവസാന മത്സരമായതിനാലാകാം കോലി ഇതു ചെയ്തതെന്ന് ചിലര്.
അഡ്ലെയ്ഡില് ഇതിനു മുന്പു കളിച്ച രണ്ട് ഏകദിനങ്ങളിലും കോലിക്ക് സെഞ്ചറിയുണ്ട്. ഓസ്ട്രേലിയക്കെതിരെ നിറംമങ്ങിയതോടെ ഇന്ത്യന് ടീമില് കോലിയുടെ സ്ഥാനം ചോദ്യചിഹ്നത്തിലാണ്. നാളെ സിഡ്നിയില് നടക്കുന്ന പരമ്പരയിലെ അവസാന മത്സരത്തില് കോലി അപ്രതീക്ഷിത തീരുമാനങ്ങളെടുക്കുമോയെന്നാണ് ആരാധകര് ഉറ്റുനോക്കുന്നത്.