ഇന്ത്യൻ ഗുസ്തി ചരിത്രത്തിൽ പുതിയ അധ്യായം കുറിച്ച് മനീഷ ഭൻവാല. ലോക ഗുസ്തി ചാമ്പ്യൻഷിപ്പിൽ ചരിത്രത്തിലാദ്യമായി ഇന്ത്യയ്ക്ക് വനിതാ വിഭാഗത്തിൽ സ്വർണ മെഡൽ സമ്മാനിച്ചാണ് മനീഷ തിളങ്ങിയത്. സീനിയർ വിഭാഗത്തിൽ ലോക ചാമ്പ്യനാകുന്ന ആദ്യ ഇന്ത്യൻ വനിതാ താരം എന്ന അപൂർവ്വ നേട്ടവും ഇതോടെ മനീഷ സ്വന്തമാക്കി.

കസാഖിസ്ഥാനിലെ അസ്താനയിൽ നടന്ന 59 കിലോ വനിതാ വിഭാഗം ഫൈനലിൽ പാൻ അമേരിക്കൻ ചാമ്പ്യനായ യു.എസ്.എയുടെ അബിഗെയ്ൽ നെറ്റെയെ കീഴടക്കിയാണ് മനീഷയുടെ ചരിത്രവിജയം. മത്സരത്തിന്റെ തുടക്കത്തിൽ 0-6 എന്ന സ്കോറിന് ഏറെ പിന്നിലായിരുന്ന മനീഷ, അവിശ്വസനീയമായ തിരിച്ചുവരവിലൂടെ 8-6 എന്ന സ്കോറിനാണ് വിജയം പിടിച്ചെടുത്തത്. സീനിയർ ലോക ചാമ്പ്യൻഷിപ്പിൽ 16 വർഷത്തിന് ശേഷമാണ് ഒരു ഇന്ത്യൻ താരം സ്വർണം നേടുന്നത്. 2010-ൽ പുരുഷ വിഭാഗത്തിൽ സുശീൽ കുമാർ നേടിയ സ്വർണത്തിന് ശേഷം ഈ നേട്ടം കൈവരിക്കുന്ന ആദ്യ താരമാണ് മനീഷ.

മനീഷയ്ക്ക് പുറമെ 50 കിലോ വിഭാഗത്തിൽ നീലം സിരോഹിയും 76 കിലോ വിഭാഗത്തിൽ കാൽ ധോചക്കും വെള്ളി മെഡലുകൾ സ്വന്തമാക്കി. ഇതാദ്യമായാണ് ലോക പോരാട്ടത്തിൽ മൂന്ന് ഇന്ത്യൻ വനിതാ താരങ്ങൾ ഒരേസമയം ഫൈനലിൽ പ്രവേശിക്കുന്നത്. ഒരു സ്വർണവും രണ്ട് വെള്ളിയുമടക്കം മിന്നുന്ന പ്രകടനത്തോടെയാണ് ഇന്ത്യൻ സംഘം ടൂർണമെന്റ് പൂർത്തിയാക്കിയത്.