പരാഗ്വേയുടെ കടുത്ത പ്രതിരോധം മറികടന്ന് ഫ്രാൻസ് ക്വാർട്ടർ ഫൈനലിലേക്ക് യോഗ്യത നേടി. ഫിലാഡൽഫിയയിൽ നടന്ന ആവേശപ്പോരാട്ടത്തിൽ ഏകപക്ഷീയമായ ഒരു ഗോളിനായിരുന്നു മുൻ ലോക ചാമ്പ്യന്മാരുടെ വിജയം. കളിയുടെ എഴുപതാം മിനിറ്റിൽ ലഭിച്ച പെനാൽറ്റി വലയിലെത്തിച്ച് ക്യാപ്റ്റൻ കിലിയൻ എംബാപ്പെയാണ് ഫ്രഞ്ച് പടയുടെ രക്ഷകനായത്. ഈ ഗോളോടെ ടൂർണമെന്റിലെ ടോപ് സ്‌കോറർമാരുടെ പട്ടികയിൽ ഏഴ് ഗോളുകളുമായി എംബാപ്പെ ലയണൽ മെസ്സിക്ക് ഒപ്പമെത്തി.

ഇരുടീമുകളും പരുക്കൻ അടവുകളുമായി കളംനിറഞ്ഞ മത്സരത്തിന്റെ ആദ്യ പകുതിയിൽ ഗോളുകളൊന്നും പിറന്നിരുന്നില്ല. പന്തടക്കത്തിൽ ഫ്രാൻസ് മുന്നിട്ടുനിന്നെങ്കിലും ആദ്യ പകുതിയിൽ ഒരൊറ്റ ഷോട്ട് പോലും പരാഗ്വേ പോസ്റ്റിലേക്ക് തൊടുക്കാൻ അവർക്കായില്ല. എന്നാൽ രണ്ടാം പകുതിയിൽ ഫ്രഞ്ച് താരം ഡിസൈരെ ദുവേയെ ബോക്സിനുള്ളിൽ ഫൗൾ ചെയ്തതിന് ലഭിച്ച പെനാൽറ്റി എംബാപ്പെ കൃത്യമായി ലക്ഷ്യത്തിലെത്തിക്കുകയായിരുന്നു. നിരവധി ഫൗളുകൾ കണ്ട മത്സരത്തിൽ റഫറിങ്ങിനെതിരെയും വിമർശനങ്ങൾ ഉയരുന്നുണ്ട്. ക്വാർട്ടറിൽ കടന്ന ഫ്രാൻസ് ജൂലൈ പത്തിന് നടക്കുന്ന മത്സരത്തിൽ കരുത്തരായ മൊറോക്കോയെ നേരിടും.