ഐപിഎല്ലിൽ പരാജയമറിയാത്ത കുതിപ്പ് തുടര്‍ന്ന് പഞ്ചാബ് കിങ്‌സ്. സീസണിലെ ഏറ്റവും ഉയർന്ന സ്കോർ പിറന്ന ആവേശപ്പോരാട്ടത്തിൽ ലഖ്‌നൗ സൂപ്പര്‍ ജയന്റ്‌സിനെ 54 റണ്‍സിനാണ് പഞ്ചാബ് പരാജയപ്പെടുത്തിയത്. ആദ്യം ബാറ്റ് ചെയ്ത പഞ്ചാബ് നിശ്ചിത ഓവറിൽ ഏഴ് വിക്കറ്റ് നഷ്ടത്തിൽ 254 റൺസെന്ന കൂറ്റൻ ടോട്ടൽ പടുത്തുയർത്തി. മറുപടി ബാറ്റിംഗിനിറങ്ങിയ ലഖ്‌നൗവിന് 20 ഓവറിൽ അഞ്ച് വിക്കറ്റ് നഷ്ടത്തിൽ 200 റൺസെടുക്കാനേ സാധിച്ചുള്ളൂ. ഈ വിജയത്തോടെ ടൂർണമെന്റിൽ തോൽവി അറിയാത്ത ഏക ടീമായി പഞ്ചാബ് മാറി.

ടോസ് നഷ്ടപ്പെട്ട് ബാറ്റിംഗിനിറങ്ങിയ പഞ്ചാബ് തുടക്കം മുതൽ ലഖ്‌നൗ ബൗളർമാരെ കടന്നാക്രമിച്ചു. ഓപ്പണർ പ്രഭ്‌സിമ്രാൻ സിംഗിനെ തുടക്കത്തിൽ നഷ്ടമായെങ്കിലും പ്രിയാംശ് ആര്യയും കൂപ്പർ കോണോലിയും ചേർന്ന് ലഖ്‌നൗവിനെ തകർത്തുവിട്ടു. വെറും 13.5 ഓവറിൽ 182 റൺസാണ് ഈ സഖ്യം അടിച്ചുകൂട്ടിയത്. പ്രിയാംശ് ആര്യ 37 പന്തിൽ 93 റൺസെടുത്തപ്പോൾ, കോണോലി 46 പന്തിൽ 87 റൺസ് നേടി. ഇരുവരും സെഞ്ച്വറിക്കരികെയാണ് വീണത്. അവസാന ഓവറുകളിൽ മാർക്കസ് സ്റ്റോയിനിസും ശശാങ്ക് സിംഗും തകർത്തടിച്ചതോടെ പഞ്ചാബ് സ്കോർ 250 കടന്നു. ലഖ്‌നൗ നിരയിൽ പ്രിൻസ് യാദവും മണിമാരൻ സിദ്ധാർത്ഥും രണ്ട് വിക്കറ്റുകൾ വീതം വീഴ്ത്തി.

255 റൺസ് വിജയലക്ഷ്യവുമായിറങ്ങിയ ലഖ്‌നൗവിനായി ക്യാപ്റ്റൻ ഋഷഭ് പന്ത് (43), എയ്ഡൻ മാർക്രം (42), മിച്ചൽ മാർഷ് (40) എന്നിവർ പൊരുതിയെങ്കിലും റൺറേറ്റ് ഉയർത്താനായില്ല. പഞ്ചാബിനായി മാർക്കോ യാൻസൻ രണ്ട് വിക്കറ്റ് വീഴ്ത്തിയപ്പോൾ അർഷ്ദീപ് സിംഗ്, യുസ്‌വേന്ദ്ര ചഹൽ, വൈശാഖ് വിജയകുമാർ എന്നിവർ ഓരോ വിക്കറ്റ് വീതം നേടി. 21 സിക്‌സറുകളാണ് മത്സരത്തിലാകെ പഞ്ചാബ് ബാറ്റർമാർ പറത്തിയത്. നിലവിൽ മികച്ച ഫോമിലുള്ള പഞ്ചാബ് പോയിന്റ് പട്ടികയിൽ ഒന്നാം സ്ഥാനത്ത് തുടരുകയാണ്.