വാങ്കഡെയിൽ കണ്ടത് വിസ്മയകരമായ പോരാട്ടം. ടി20 ലോകകപ്പിന്റെ രണ്ടാം സെമി ഫൈനലിൽ ഇംഗ്ലണ്ടിനെ 7 റൺസിന് തകർത്ത് ഇന്ത്യ കലാശപ്പോരിന് യോഗ്യത നേടി. ഇന്ത്യ ഉയർത്തിയ 254 റൺസെന്ന കൂറ്റൻ ലക്ഷ്യം പിന്തുടർന്ന ഇംഗ്ലണ്ട്, ജേക്കബ് ബെഥേലിന്റെ (48 പന്തിൽ 105) അവിശ്വസനീയമായ പോരാട്ടവീര്യത്തിൽ വിജയത്തിനടുത്തെത്തിയെങ്കിലും അവസാന ഓവറുകളിൽ ഇന്ത്യ കളി പിടിച്ചു. ബാറ്റിംഗിലെ വെടിക്കെട്ടിന് പുറമെ ഫീൽഡിംഗിലും നിർണ്ണായക ഇടപെടൽ നടത്തിയ മലയാളി താരം സഞ്ജു സാംസണാണ് മത്സരത്തിലെ താരം. ഞായറാഴ്ച അഹമ്മദാബാദിൽ നടക്കുന്ന ഫൈനലിൽ ഇന്ത്യ ന്യൂസിലൻഡിനെ നേരിടും.

ആദ്യം ബാറ്റ് ചെയ്ത ഇന്ത്യ 7 വിക്കറ്റ് നഷ്ടത്തിൽ 253 റൺസെന്ന പടുകൂറ്റൻ സ്കോറാണ് പടുത്തുയർത്തിയത്. 42 പന്തിൽ 89 റൺസെടുത്ത സഞ്ജുവിന്റെ ഇന്നിങ്‌സായിരുന്നു ഇന്ത്യൻ ബാറ്റിംഗിന്റെ നട്ടെല്ല്. എന്നാൽ മറുപടി ബാറ്റിംഗിനിറങ്ങിയ ഇംഗ്ലണ്ടിനായി ബെഥേൽ കത്തിക്കയറിയതോടെ കളി കൈവിടുമെന്ന അവസ്ഥയിലായി. അഞ്ചാം വിക്കറ്റിൽ വിൽ ജാക്സിനൊപ്പം ബെഥേൽ തീർത്ത 77 റൺസ് കൂട്ടുകെട്ട് ഇന്ത്യൻ ക്യാമ്പിൽ വലിയ ആശങ്കയുണ്ടാക്കി. എന്നാൽ പത്തൊമ്പതാം ഓവറിൽ ഒമ്പത് റൺസ് മാത്രം വഴങ്ങി സാം കറനെ പുറത്താക്കിയ ഹാർദിക് പാണ്ഡ്യയും, അവസാന ഓവറിൽ ബെഥേലിനെ മാരകമായ ത്രോയിലൂടെ റണ്ണൗട്ടാക്കിയ സഞ്ജുവും ഇന്ത്യയെ വിജയതീരത്തെത്തിച്ചു.

അവസാന മൂന്നോവറിൽ 45 റൺസായിരുന്നു ഇംഗ്ലണ്ടിന് ജയിക്കാൻ വേണ്ടിയിരുന്നത്. പതിനെട്ടാം ഓവർ എറിഞ്ഞ ജസ്പ്രീത് ബുമ്ര വെറും 6 റൺസ് മാത്രം നൽകി സമ്മർദ്ദം കൂട്ടി. അവസാന ഓവറിൽ 30 റൺസ് വേണ്ടിയിരിക്കെ ആദ്യ പന്തിൽ തന്നെ ബെഥേൽ റണ്ണൗട്ടായത് ഇംഗ്ലണ്ടിന്റെ എല്ലാ പ്രതീക്ഷകളും തകർത്തു. ശിവം ദുബെ എറിഞ്ഞ ഓവറിലെ അവസാന മൂന്ന് പന്തുകളിൽ സിക്സറുകൾ പിറന്നെങ്കിലും 7 റൺസ് അകലെ ഇംഗ്ലണ്ട് പൊരുതി വീണു. ഇതോടെ നാലാം തവണയും ഇന്ത്യ ടി20 ലോകകപ്പിന്റെ ഫൈനലിലേക്ക് മാർച്ച് ചെയ്തു.