അണ്ടർ-19 ഏഷ്യാകപ്പ് ക്രിക്കറ്റ് ഫൈനലിൽ ഇന്ത്യയ്‌ക്കെതിരേ ടോസ് നേടിയ പാകിസ്താൻ ബാറ്റിങ് തിരഞ്ഞെടുത്തു. ഗ്രൂപ്പ് ഘട്ടത്തിൽ ഇന്ത്യയെ തോൽപ്പിച്ച ആത്മവിശ്വാസത്തിലാണ് പാകിസ്താൻ കലാശപ്പോരാട്ടത്തിനിറങ്ങുന്നത്. അതേസമയം, ഗ്രൂപ്പ് ഘട്ടത്തിലെ തോൽവിക്ക് പകരംവീട്ടി കിരീടം സ്വന്തമാക്കുകയാണ് ഇന്ത്യൻ കൗമാരപ്പടയുടെ ലക്ഷ്യം.

ഗ്രൂപ്പ് ഘട്ടത്തിൽ പാകിസ്താനെതിരെ ഇന്ത്യ 22/3 എന്ന നിലയിൽ തകരുമ്പോൾ ക്രീസിലെത്തി 85 പന്തിൽ 107 റൺസ് അടിച്ചുകൂട്ടിയ അർജുൻ രാജ്പുതാണ് ഇന്ത്യയുടെ പ്രധാന പ്രതീക്ഷ. ഓഫ് സ്പിന്നർ കൂടിയായ ഈ ഇടങ്കയ്യൻ ബാറ്റർ മികച്ച ഫോമിലാണ്.

ഇതിഹാസതാരം വീരേന്ദർ സെവാഗിന്റെ മകൻ ആര്യവീർ സെവാഗും ഇന്ത്യൻ നിരയിലെ ശ്രദ്ധാകേന്ദ്രമാണ്. ടൂർണമെന്റിൽ 70 റൺസ്, 160 റൺസ്, 51 റൺസ് എന്നിങ്ങനെ മികച്ച പ്രകടനങ്ങൾ കാഴ്ചവെച്ച ആര്യവീറിൽനിന്ന് നിർണായക ഇന്നിങ്‌സാണ് ആരാധകർ പ്രതീക്ഷിക്കുന്നത്. ക്യാപ്റ്റൻ ലക്ഷ്യ റായ്ചന്ദാനി, വി.കെ. വിനീത്, രാഹുൽ ദ്രാവിഡിന്റെ മകൻ അൻവെയ് ദ്രാവിഡ് എന്നിവരും ഇന്ത്യയുടെ പ്രതീക്ഷകളാണ്.

എട്ടുതവണ അണ്ടർ-19 ഏഷ്യാകപ്പ് കിരീടം നേടിയിട്ടുള്ള ഇന്ത്യയ്ക്ക് കഴിഞ്ഞ രണ്ട് പതിപ്പുകളിലും ഫൈനലിൽ കാലിടറിയിരുന്നു. 2025-ലെ ഫൈനലിൽ പാകിസ്താനോടായിരുന്നു തോൽവി. ഇത്തവണ ഗ്രൂപ്പ് ഘട്ടത്തിലും പാകിസ്താനോട് പരാജയപ്പെട്ട ഇന്ത്യയ്ക്ക് ഫൈനൽ പകരംവീട്ടാനുള്ള അവസരം കൂടിയാണ്.