വനിതാ ട്വന്റി-20 ഏഷ്യാ കപ്പിൽ ഇന്ത്യയുടെ ആദ്യ പോരാട്ടം ഇന്ന്. ഗ്രൂപ്പ് എയിൽ താരതമ്യേന ദുർബലരായ തായ്‌ലൻഡാണ് ഇന്ത്യയുടെ എതിരാളികൾ. ദുബായ് അന്താരാഷ്ട്ര ക്രിക്കറ്റ് സ്റ്റേഡിയത്തിൽ രാത്രി എട്ടു മുതലാണ് മത്സരം നടക്കുക. ആദ്യ മത്സരത്തിൽ തായ്‌ലൻഡ് ഹോങ് കോങ്ങിനെ ആറ് റൺസിന് പരാജയപ്പെടുത്തിയിരുന്നു. ചിരവൈരികളായ പാകിസ്താനാണ് ഗ്രൂപ്പിലെ മറ്റൊരു പ്രധാന ടീം. സെപ്റ്റംബർ അഞ്ചിനാണ് ഏറെ പ്രതീക്ഷയോടെ കാത്തിരിക്കുന്ന ഇന്ത്യാ-പാക് പോരാട്ടം. വലിയ ജയത്തോടെ ടൂർണമെന്റിൽ മികച്ച തുടക്കം കുറിക്കുകയാണ് ഹർമൻപ്രീത് കൗർ നയിക്കുന്ന ഇന്ത്യൻ സംഘത്തിന്റെ ലക്ഷ്യം. ലോകകപ്പിൽ ഗ്രൂപ്പ് ഘട്ടത്തിൽ തന്നെ പുറത്തായതിന്റെ നിരാശ മറികടക്കാൻ ഏഷ്യാ കപ്പ് കിരീടത്തിൽ കുറഞ്ഞതൊന്നും പ്രതീക്ഷ നൽകുന്നില്ല. ടൂർണമെന്റിനുശേഷം ഏഷ്യൻ ഗെയിംസ് വരാനിരിക്കെ, ഏഷ്യാ കപ്പിലെ പ്രകടനം ടീമിന്റെ ആത്മവിശ്വാസത്തിൽ നിർണായകമാകും.

ഇതുവരെ നടന്ന ഏഷ്യാ കപ്പുകളിൽ വലിയ ആധിപത്യം പുലർത്താൻ കഴിഞ്ഞിട്ടുണ്ടെങ്കിലും, 2026 ഇന്ത്യയെ സംബന്ധിച്ച് തിരിച്ചടികളുടെ വർഷമായിരുന്നു. കളിച്ച 16 ടിട്വന്റികളിൽ ഒൻപതിലും തോൽവി വഴങ്ങേണ്ടിവന്നു. ക്യാപ്റ്റൻ ഹർമൻപ്രീതിന്റെയും മധ്യനിരയുടെയും ഫോമില്ലായ്മ ഇന്ത്യയ്ക്ക് വലിയ ആശങ്കയാണ് നൽകുന്നത്. പരിക്കേറ്റ ജമൈമ റോഡ്രിഗസിന് പകരം പ്രതിക റാവൽ ടീമിലെത്തിയിട്ടുണ്ട്. സ്മൃതി മന്ദാന, ഷഫാലി വർമ എന്നിവർ നൽകുന്ന തുടക്കത്തിന് ശേഷം മധ്യനിരയെ താങ്ങിനിർത്താൻ ഹർമൻപ്രീത്, റിച്ച ഘോഷ്, ദീപ്തി ശർമ എന്നിവർ തിളങ്ങേണ്ടതുണ്ട്.

അതേസമയം, ദീപ്തി ശർമ, രാധ യാദവ്, ശ്രീചരണി, രേണുക സിങ് താക്കൂർ എന്നിവരുൾപ്പെടുന്ന ബൗളിങ് നിരയിലാണ് ഇന്ത്യയുടെ പ്രധാന പ്രതീക്ഷ. ബൗളിങ്ങിൽ മികച്ചുനിൽക്കുമ്പോഴും ഫീൽഡിങ്ങിലെ പിഴവുകൾ നികത്തുന്നത് ഇന്ത്യയ്ക്ക് പ്രധാന വെല്ലുവിളിയായി തുടരുന്നു.