ആർട്ടിഫിഷ്യൽ ഇന്റലിജൻസിന്റെ (എഐ) വർദ്ധിച്ചുവരുന്ന ഉപയോഗം മൂലം ഡേറ്റ സെന്ററുകളുടെ വെള്ളത്തിന്റെയും ഊർജത്തിന്റെയും ഉപയോഗവും അതുവഴിയുള്ള മലിനീകരണവും അടുത്ത നാല് വർഷത്തിനുള്ളിൽ ഇരട്ടിയാകുമെന്ന് ഐക്യരാഷ്ട്ര സംഘടനയുടെ യൂണിവേഴ്സിറ്റി റിപ്പോർട്ട്. കംപ്യൂട്ടിങ് സാമഗ്രികളും ഡേറ്റ സംഭരണികളും ഉൾപ്പെടുന്ന വമ്പൻ കേന്ദ്രങ്ങളായ ഡേറ്റ സെന്ററുകൾ നിലവിൽ വരുത്തുന്ന പാരിസ്ഥിതിക ആഘാതം ലോകത്തെ പല വൻകിട രാജ്യങ്ങളോടും കിടപിടിക്കുന്നതാണെന്നും റിപ്പോർട്ട് ചൂണ്ടിക്കാണിക്കുന്നു. എഐ സാങ്കേതികവിദ്യ പരിസ്ഥിതിയിലുണ്ടാക്കുന്ന ദോഷങ്ങളെക്കുറിച്ച് വ്യക്തമാക്കുന്ന ആദ്യത്തെ യുഎൻ റിപ്പോർട്ടാണിത്.

റിപ്പോർട്ടിലെ പ്രധാന കണ്ടെത്തലുകൾ

• ഊർജ ഉപയോഗം: കഴിഞ്ഞ വർഷം ആഗോളതലത്തിൽ ഡേറ്റ സെന്ററുകൾ ഉപയോഗിച്ചത് 448 ലക്ഷം കോടി വാട്ട് അവർ വൈദ്യുതിയാണ്.
• കാർബൺ പുറന്തള്ളലും ജലഉപയോഗവും: ഈ കനത്ത വൈദ്യുതി ഉപയോഗം മൂലം ഏകദേശം 20.8 കോടി ടൺ കാർബൺ ഡയോക്സൈഡ് പുറന്തള്ളപ്പെട്ടു. ഇത് അർജന്റീന എന്ന രാജ്യം ഒരു വർഷം പുറന്തള്ളുന്ന മലിനീകരണത്തിന് തുല്യമാണ്. ഇത്രയും ഊർജം ഉൽപാദിപ്പിക്കുന്നതിനായി ഏകദേശം 4.5 ലക്ഷം കോടി ലീറ്റർ വെള്ളവും ആവശ്യമായി വന്നു.
• ആഗോള ഊർജ വിഹിതം: 2030-ഓടെ ലോകത്ത് ഉപയോഗിക്കുന്ന മൊത്തം വൈദ്യുതിയുടെ ഏകദേശം 3 ശതമാനവും ഡേറ്റ സെന്ററുകളിലായിരിക്കും ഉപയോഗിക്കുക. ആ വർഷം ഇവ പുറന്തള്ളുന്ന കാർബൺ ഡയോക്സൈഡിന്റെ അളവ് 44 കോടി ടണ്ണായി ഉയരും.
• എഐയുടെ പങ്ക്: നിലവിൽ ഡേറ്റ സെന്ററുകളിലെ ഊർജ ഉപയോഗത്തിന്റെ 20 ശതമാനത്തിന് കാരണം എഐ ആണെങ്കിൽ, 2030 ആകുമ്പോഴേക്കും ഇത് 40 ശതമാനമായി വർദ്ധിക്കും.