ഇന്റർനെറ്റിലെ കുട്ടികളുടെ ലൈംഗികാതിക്രമ ഉള്ളടക്കങ്ങളുമായി (CSAM) ബന്ധപ്പെട്ട വിവരങ്ങൾ ഇനിമുതൽ ഇന്ത്യയിലെ ഉദ്യോഗസ്ഥർക്ക് നേരിട്ട് കൈമാറുമെന്ന് ഗൂഗിൾ. കേന്ദ്ര സർക്കാരിന്റെ കടുത്ത സമ്മർദ്ദത്തെ തുടർന്നാണ് ഈ സുപ്രധാന തീരുമാനം. കഴിഞ്ഞ ആഴ്ച മെറ്റയും സമാനമായ മാറ്റം വരുത്തിയിരുന്നു.

ഇതുവരെ ഗൂഗിളും മെറ്റയും ഉൾപ്പെടെയുള്ള പ്രമുഖ ടെക് കമ്പനികൾ ഇത്തരം ഉള്ളടക്കങ്ങൾ കണ്ടെത്തിയാൽ യു.എസ് ആസ്ഥാനമായുള്ള നാഷണൽ സെന്റർ ഫോർ മിസ്സിംഗ് ആന്റ് എക്സ്പ്ലോയിറ്റഡ് ചിൽഡ്രൻ (NCMEC) എന്ന എൻ.ജി.ഒയ്ക്കാണ് വിവരങ്ങൾ കൈമാറിയിരുന്നത്. അവിടെ നിന്ന് പരിശോധിച്ച ശേഷമാണ് അതത് രാജ്യങ്ങളിലെ ലോ എൻഫോഴ്‌സ്‌മെന്റ് ഏജൻസികളിലേക്ക് വിവരമെത്തിയിരുന്നത്. ഈ നീണ്ട പ്രക്രിയ അടിയന്തര സ്വഭാവമുള്ള കേസുകളിൽ വിലപ്പെട്ട സമയം നഷ്ടപ്പെടുത്തുന്നുവെന്ന് ഇന്ത്യ ചൂണ്ടിക്കാട്ടിയിരുന്നു.

കുട്ടികളെ ലൈംഗികമായി ദുരുപയോഗം ചെയ്യുന്ന ഉള്ളടക്കങ്ങൾ തടയുന്നതിൽ കമ്പനി ശക്തമായ നടപടികൾ സ്വീകരിക്കുന്നുണ്ടെന്ന് ഗൂഗിൾ വക്താവ് വ്യക്തമാക്കി. യൂട്യൂബിനും മെറ്റയുടെ വിവിധ പ്ലാറ്റ്‌ഫോമുകൾക്കും ഏറ്റവും വലിയ ഉപയോക്തൃ ശൃംഖലയുള്ളത് ഇന്ത്യയിലാണ്. അടിയന്തര സഹായവും വിവരകൈമാറ്റവും ഉറപ്പാക്കുന്ന പുതിയ സംവിധാനം രാജ്യത്തെ കുട്ടികൾക്കെതിരായ സൈബർ കുറ്റകൃത്യങ്ങൾ തടയുന്നതിൽ നിർണ്ണായക വഴിത്തിരിവാകും.