ഇനി വാട്സ്ആപ്പ് നമ്പർ അപരിചിതരിലേക്ക് പോകുമെന്ന ഭയം വേണ്ട; ഫോൺ നമ്പറില്ലാതെ ചാറ്റ് ചെയ്യാം, പുത്തൻ 'യൂസർനെയിം' ഫീച്ചറുമായി മെറ്റ
ലോകമെമ്പാടും കോടിക്കണക്കിന് ആളുകൾ ദിവസേന ഉപയോഗിക്കുന്ന പ്രമുഖ മെസ്സേജിങ് ആപ്പായ വാട്സ്ആപ്പിൽ (WhatsApp) വിപ്ലവകരമായ മാറ്റത്തിനൊരുങ്ങി മാതൃകമ്പനിയായ മെറ്റ. സുരക്ഷയ്ക്കും സ്വകാര്യതയ്ക്കും മുൻഗണന നൽകുന്ന ഉപയോക്താക്കൾ ഏറെക്കാലമായി കാത്തിരുന്ന 'യൂസർനെയിം' (Username) സംവിധാനമാണ് വാട്സ്ആപ്പ് അണിയറയിൽ ഒരുക്കുന്നത്. ടെലഗ്രാം, ഇൻസ്റ്റഗ്രാം തുടങ്ങിയ സോഷ്യൽ മീഡിയ പ്ലാറ്റ്ഫോമുകളിൽ നിലവിലുള്ളതിന് സമാനമായ ഈ ഫീച്ചർ വരുന്നതോടെ, നിങ്ങളുടെ വ്യക്തിഗത ഫോൺ നമ്പർ മറ്റാരുമായും പങ്കുവെക്കാതെ തന്നെ വാട്സ്ആപ്പിൽ സുരക്ഷിതമായി ആശയവിനിമയം നടത്താൻ സാധിക്കും.
പൂർണ്ണമായും ഓപ്ഷണൽ; എപ്പോൾ വേണമെങ്കിലും മാറ്റാം
നിലവിൽ ചില ആൻഡ്രോയിഡ്, ആപ്പിൾ ഐഫോൺ ഉപയോക്താക്കളിൽ വാട്സ്ആപ്പ് ഈ ഫീച്ചറിന്റെ പരീക്ഷണം വിജയകരമായി പൂർത്തിയാക്കിയിട്ടുണ്ട്. തികച്ചും ഓപ്ഷണൽ (Optional) രീതിയിലാണ് ഈ സംവിധാനം മെറ്റ ഒരുക്കുന്നത്. അതായത്, ഫോൺ നമ്പർ മറച്ചുവെച്ച് യൂസർനെയിം ഉപയോഗിക്കണോ വേണ്ടയോ എന്നത് ഉപയോക്താക്കൾക്ക് സ്വയം തീരുമാനിക്കാം.
ഒരു അക്കൗണ്ടിന് ഒരു യൂസർനെയിം മാത്രമേ തിരഞ്ഞെടുക്കാൻ സാധിക്കൂ. എന്നാൽ, നിലവിലുള്ള ചാറ്റുകളെയോ അക്കൗണ്ട് ആക്ടിവിറ്റികളെയോ യാതൊരുവിധത്തിലും ബാധിക്കാതെ തന്നെ ഈ യൂസർനെയിം എപ്പോൾ വേണമെങ്കിലും ഇഷ്ടാനുസരണം മാറ്റിയെടുക്കാനും ഉപയോക്താക്കൾക്ക് സ്വാതന്ത്ര്യമുണ്ടായിരിക്കും.
യൂസർനെയിം സെറ്റ് ചെയ്യുമ്പോൾ ശ്രദ്ധിക്കേണ്ട കാര്യങ്ങൾ:
- യൂണിക് ആയിരിക്കണം: മറ്റൊരാൾ ഉപയോഗിച്ച യൂസർനെയിം വീണ്ടും ഉപയോഗിക്കാൻ സാധിക്കില്ല. ഒാരോ ഉപയോക്താവിനും വ്യത്യസ്തമായ (Unique) പേര് മാത്രമായിരിക്കും ലഭിക്കുക.
- അക്ഷരങ്ങളും അക്കങ്ങളും മാത്രം: യൂസർനെയിമിൽ 3 മുതൽ 35 വരെയുള്ള ക്യാരക്ടറുകൾ (Characters) മാത്രമേ പാടുള്ളൂ. ഇതിനായി ഇംഗ്ലീഷ് അക്ഷരങ്ങളും അക്കങ്ങളും മാത്രമേ ഉപയോഗിക്കാൻ അനുവാദമുള്ളൂ.
- എളുപ്പത്തിൽ ഓൺ ചെയ്യാം: ഈ ഫീച്ചർ ലഭ്യമാകുന്നതോടെ വാട്സ്ആപ്പ് സെറ്റിങ്സിലെ (Settings) പ്രൊഫൈൽ സെക്ഷനിൽ കയറി ഉപയോക്താക്കൾക്ക് യൂസർനെയിം ഓപ്ഷൻ ഓൺ ചെയ്യാൻ സാധിക്കും.
വ്യാപാരികൾക്കും കമ്മ്യൂണിറ്റികൾക്കും വലിയ ആശ്വാസം
ഓൺലൈൻ കച്ചവടക്കാർ, വിതരണക്കാർ, വലിയ വാട്സ്ആപ്പ് കമ്മ്യൂണിറ്റി ഗ്രൂപ്പുകളിലുള്ളവർ, അപരിചിതരുമായി ബിസിനസ്സ് ആവശ്യങ്ങൾക്ക് ചാറ്റ് ചെയ്യേണ്ടി വരുന്നവർ എന്നിവർക്കെല്ലാം ഈ ഫീച്ചർ വലിയ സുരക്ഷയൊരുക്കും. ഫോൺ നമ്പർ പരസ്യമാകാത്തതിനാൽ അനാവശ്യ കോളുകളിൽ നിന്നും മെസ്സേജുകളിൽ നിന്നും ഒരു പരിധിവരെ രക്ഷനേടാൻ ഇത് സഹായിക്കുമെന്നാണ് കമ്പനിയുടെ വിലയിരുത്തൽ.
നിലവിൽBeta പതിപ്പുകളിൽ പരീക്ഷണ ഘട്ടത്തിലുള്ള ഈ അത്യാധുനിക ഫീച്ചർ 2026-ന്റെ അവസാനത്തോടെ ലോകമെമ്പാടുമുള്ള എല്ലാ ഉപയോക്താക്കൾക്കുമായി വ്യാപകമായ രീതിയിൽ ലഭ്യമാക്കുമെന്നാണ് റിപ്പോർട്ടുകൾ സൂചിപ്പിക്കുന്നത്.