സ്മാർട്ട്ഫോൺ ഉപയോക്താക്കളെ നിരന്തരം അലട്ടുന്ന പരസ്യ നോട്ടിഫിക്കേഷനുകൾ നിയന്ത്രിക്കാൻ പുതിയ സുരക്ഷാ ഫീച്ചറുമായി സാംസങ് എത്തുന്നു. കമ്പനിയുടെ ഏറ്റവും പുതിയ സോഫ്റ്റ്‌വെയർ അപ്‌ഡേറ്റായ 'വൺ യു.ഐ' (One UI) ബീറ്റ പതിപ്പിലാണ് ഈ പുതിയ സംവിധാനം കണ്ടെത്തിയിരിക്കുന്നത്. അമിതമായി പ്രമോഷണൽ മെസേജുകളും പരസ്യങ്ങളും അയക്കുന്ന ആപ്പുകളെ സ്വയം തിരിച്ചറിഞ്ഞ് അവയുടെ നോട്ടിഫിക്കേഷനുകൾ നിയന്ത്രിക്കാനോ ബ്ലോക്ക് ചെയ്യാനോ ഈ ഫീച്ചർ ഉപയോക്താക്കളെ സഹായിക്കും.

തുടർച്ചയായി വരുന്ന മാർക്കറ്റിംഗ് അലർട്ടുകളും ഓഫർ നോട്ടിഫിക്കേഷനുകളും കാരണം ഉപയോക്താക്കൾ നേരിടുന്ന അസൗകര്യം കണക്കിലെടുത്താണ് സാംസങ്ങിന്റെ ഈ നീക്കം. സ്പാം നോട്ടിഫിക്കേഷനുകൾ കുറയ്ക്കുന്നതിനായി ഇത്തരം ആപ്പുകളെ പൂർണ്ണമായും ബ്ലോക്ക് ചെയ്യാനോ അല്ലെങ്കിൽ ഓരോ ആപ്പും അയക്കുന്ന നോട്ടിഫിക്കേഷനുകൾ മാനുവലായി നിയന്ത്രിക്കാനോ ഉള്ള ഓപ്ഷനുകൾ പുതിയ അപ്‌ഡേറ്റിൽ ലഭിക്കും. വൺ യു.ഐ-യുടെ വരാനിരിക്കുന്ന പതിപ്പുകളിൽ ഈ ഫീച്ചർ ഉൾപ്പെടുത്തിയേക്കുമെന്നാണ് റിപ്പോർട്ടുകൾ സൂചിപ്പിക്കുന്നത്.

സാംസങ് ഈ ഫീച്ചറിനെക്കുറിച്ച് ഇതുവരെ ഔദ്യോഗിക പ്രഖ്യാപനം നടത്തിയിട്ടില്ലെങ്കിലും, വൺ യു.ഐ ബീറ്റ വേർഷനുകളിൽ പരീക്ഷിച്ച ശേഷം ഗാലക്സി സ്മാർട്ട്ഫോണുകളിലേക്ക് ഇത് വ്യാപകമായി എത്തിച്ചേരാനാണ് സാധ്യത. ഉപയോക്താക്കളുടെ സ്വകാര്യതയ്ക്കും സുരക്ഷയ്ക്കും കൂടുതൽ പ്രാധാന്യം നൽകുന്നതിന്റെ ഭാഗമായി നോട്ടിഫിക്കേഷൻ നിയന്ത്രണം, ബാറ്ററി മാനേജ്‌മെന്റ്, എ.ഐ അധിഷ്ഠിത ഫീച്ചറുകൾ എന്നിവയിൽ സാംസങ് നിലവിൽ കൂടുതൽ ശ്രദ്ധ കേന്ദ്രീകരിച്ചുവരികയാണ്.