ലോകമെമ്പാടും കൊടുംചൂട് വലിയ ഭീഷണിയാകുന്ന സാഹചര്യത്തിൽ, വേനലിനെ പ്രതിരോധിക്കാൻ വേറിട്ട കണ്ടുപിടിത്തവുമായി ജപ്പാൻ. മനുഷ്യർക്ക് കയറിയിരിക്കാവുന്ന രീതിയിലുള്ള പ്രത്യേക ഫ്രിഡ്ജാണ് ജപ്പാൻ വികസിപ്പിച്ചെടുത്തിരിക്കുന്നത്. 'ഡു ഹീമോൺ ബോക്സ്' (Do Hemon Box) എന്ന് പേരിട്ടിരിക്കുന്ന ഈ ഉപകരണം, കടുത്ത ചൂടിൽ ജോലി ചെയ്യുന്നവർക്കും ഹീറ്റ് സ്ട്രോക്ക് ഉൾപ്പെടെയുള്ള ആരോഗ്യ പ്രശ്നങ്ങൾ ഒഴിവാക്കാനുമായി രൂപകൽപ്പന ചെയ്തിട്ടുള്ളതാണ്.

വലിയൊരു സ്റ്റെയിൻലെസ് സ്റ്റീൽ ഫ്രിഡ്ജിന്റെ രൂപത്തിലുള്ള ഈ ബോക്സിനുള്ളിൽ കയറി വാതിലടച്ചാൽ, തല, കഴുത്ത്, തോൾ എന്നിവിടങ്ങളിലേക്ക് തണുത്ത വായു ശക്തമായി വീശും. 15 ഡിഗ്രി സെൽഷ്യസ് താപനില നിലനിർത്തുന്ന ഈ ഉപകരണം 5 ഡിഗ്രി സെൽഷ്യസ് തണുത്ത വായുവാണ് ഉള്ളിലേക്ക് കടത്തിവിടുന്നത്. ഇത് നിമിഷങ്ങൾക്കകം ശരീര താപനില കുറയ്ക്കാൻ സഹായിക്കും.

ജപ്പാനിലെ 'ട്രസ്കോ നകയാമ കോർപറേഷൻ' ആണ് ഈ സാങ്കേതികവിദ്യ വികസിപ്പിച്ചത്. ഏകദേശം 15 ലക്ഷം യെൻ (ഏകദേശം 9.04 ലക്ഷം ഇന്ത്യൻ രൂപ) ആണ് ഇതിന്റെ വില. വിപണിയിലിറങ്ങിയത് മുതൽ സ്റ്റീൽ ഫാക്ടറികൾ, നിർമ്മാണ മേഖലകൾ, ഗോൾഫ് കോഴ്‌സുകൾ, സർവ്വകലാശാലകൾ എന്നിവടങ്ങളിലായി 200-ഓളം യൂണിറ്റുകൾ വിറ്റഴിഞ്ഞിട്ടുണ്ട്. അടുത്തിടെ കുമമോട്ടോയിലുണ്ടായ ഭൂചലനത്തിന് ശേഷം ദുരിതാശ്വാസ ക്യാമ്പുകളിലും ഇത് എത്തിച്ചിരുന്നു. ജർമ്മനി, അമേരിക്ക ഉൾപ്പെടെയുള്ള രാജ്യങ്ങളിൽ നിന്നും ഈ ഉപകരണത്തിനായി അന്വേഷണങ്ങൾ ലഭിക്കുന്നുണ്ടെന്ന് അധികൃതർ വ്യക്തമാക്കി.