ബഹിരാകാശ പര്യവേക്ഷണത്തിൽ നിർണ്ണായക നേട്ടവുമായി നാസയുടെ 'സൈക്ക്' (Psyche) ബഹിരാകാശ പേടകം. ചൊവ്വയെ ഒരു നേർത്ത ചന്ദ്രക്കലയുടെ രൂപത്തിൽ കാണിക്കുന്ന അപൂർവ്വമായ ചിത്രം സൈക്ക് പുറത്തുവിട്ടു. ഭൂമിയിൽ നിന്നും സാധാരണയായി ചുവന്ന നിറത്തിൽ ഉരുണ്ട രൂപത്തിൽ കാണാറുള്ള ചൊവ്വയെ മറ്റൊരു കോണിൽ നിന്ന് പകർത്തിയതാണ് ഈ ചിത്രത്തിന്റെ സവിശേഷത. സൂര്യപ്രകാശം കുറവായുള്ള രാത്രി വശത്തുനിന്ന് പകർത്തിയതിനാലാണ് ചൊവ്വയെ ഇത്ര നേർത്തതായി കാണപ്പെടുന്നത്.

മെയ് 15 വെള്ളിയാഴ്ച ചൊവ്വയുടെ ഉപരിതലത്തിൽ നിന്ന് ഏകദേശം 4500 കിലോമീറ്റർ മാത്രം അകലെക്കൂടിയാണ് സൈക്ക് കടന്നുപോകുന്നത്. മണിക്കൂറിൽ ഏകദേശം 19,848 കിലോമീറ്റർ വേഗതയിലാണ് പേടകം സഞ്ചരിക്കുന്നത്. ഇത്രയും ഉയർന്ന വേഗതയുണ്ടെങ്കിലും ചൊവ്വയുടെ ഗുരുത്വാകർഷണ ബലം ഉപയോഗപ്പെടുത്തി പേടകത്തിന്റെ വേഗത വർദ്ധിപ്പിക്കാനും പാത ക്രമീകരിക്കാനുമാണ് ശാസ്ത്രജ്ഞർ ലക്ഷ്യമിടുന്നത്. 'ഗ്രാവിറ്റി അസിസ്റ്റ്' എന്ന് വിളിക്കുന്ന ഈ രീതി വഴി പേടകത്തിലെ ഇന്ധനം ഗണ്യമായി ലാഭിക്കാൻ സാധിക്കും. ഒരു കവണയിൽ നിന്ന് കല്ല് എറിയുന്നതുപോലെ ഗ്രഹത്തിന്റെ ഗുരുത്വാകർഷണം ഉപയോഗിച്ച് പേടകത്തെ ലക്ഷ്യസ്ഥാനത്തേക്ക് കുതിക്കാൻ ഇത് സഹായിക്കും.

2023 ഒക്ടോബറിൽ വിക്ഷേപിച്ച സൈക്ക് പേടകം ഇതേ പേരിലുള്ള ലോഹ സമ്പുഷ്ടമായ ഛിന്നഗ്രഹത്തെ ലക്ഷ്യമാക്കിയാണ് കുതിക്കുന്നത്. ഇതിനായി സെനോൺ വാതകം ഉപയോഗിച്ചുള്ള ആധുനിക സൗരോർജ്ജ-വൈദ്യുത എൻജിനുകളാണ് പേടകത്തിലുള്ളത്. 2029-ൽ ലക്ഷ്യസ്ഥാനത്തെത്തുന്നതിന് മുൻപായി പേടകത്തിലെ ക്യാമറകളും മറ്റു ഉപകരണങ്ങളും പരിശോധിക്കാൻ ഈ ചൊവ്വാ യാത്ര സഹായിക്കും. ചൊവ്വയെ കടന്നുപോയിക്കഴിഞ്ഞാൽ ഗ്രഹത്തിന്റെ കൂടുതൽ വ്യക്തമായ ചിത്രങ്ങൾ ലഭിക്കുമെന്ന് നാസ അറിയിച്ചു.