ആഗോളതലത്തിൽ ഏറെ ആകാംക്ഷയോടെ കാത്തിരുന്ന ഓപ്പൺഎഐയുടെ ഓഹരി വിപണി പ്രവേശനവും (IPO) പബ്ലിക് ലിസ്റ്റിങ്ങും അടിയന്തരമായി നടപ്പാക്കില്ലെന്ന് കമ്പനി ചീഫ് എക്സിക്യൂട്ടീവ് ഓഫീസർ സാം ഓൾട്ട്മാൻ പ്രഖ്യാപിച്ചു. ബിസിനസ് വിപുലീകരണത്തേക്കാളും സാമ്പത്തിക നേട്ടങ്ങളേക്കാളും എ.ഐ സാങ്കേതികവിദ്യയുടെ സുരക്ഷയും വിശ്വസനീയതയും ഉറപ്പുവരുത്തുന്നതിനാണ് നിലവിൽ പ്രഥമ പരിഗണന നൽകുന്നതെന്ന് ഫോർച്യൂൺ മാസികയ്ക്ക് നൽകിയ പ്രത്യേക അഭിമുഖത്തിൽ അദ്ദേഹം വ്യക്തമാക്കി.

പൊതു കമ്പനിയായാൽ വിപണിയുടെ സാമ്പത്തിക താത്പര്യങ്ങൾക്ക് മുൻഗണന നൽകേണ്ടി വരുമെന്നും, അതിനേക്കാൾ എ.ഐ സുരക്ഷയും അലൈൻമെന്റും ഉറപ്പാക്കാനാണ് ആഗ്രഹിക്കുന്നതെന്നും ഓൾട്ട്മാൻ വ്യക്തമാക്കി. എ.ഐ ഏജന്റുകൾ പ്ലാറ്റ്‌ഫോമുകൾ ഹാക്ക് ചെയ്ത സംഭവങ്ങളും എ.ഐ ഉയർത്തുന്ന ഭീഷണികളെക്കുറിച്ചുള്ള വിദഗ്ധരുടെ മുന്നറിയിപ്പുകളും ആഗോളതലത്തിൽ ആശങ്ക വർധിപ്പിച്ചിട്ടുണ്ട്.

അടുത്ത വർഷം വരെയെങ്കിലും സ്വകാര്യ കമ്പനിയായി തുടർന്ന് സുരക്ഷ ഉറപ്പാക്കാനാണ് ശ്രമം. സാങ്കേതിക വികസനത്തിന്റെ വേഗത കുറച്ച് സുരക്ഷാ മാനദണ്ഡങ്ങൾ നിശ്ചയിക്കാനുള്ള തീരുമാനത്തിന് വ്യവസായ രംഗത്തെ മറ്റ് പ്രമുഖരും പിന്തുണ പ്രഖ്യാപിച്ചിട്ടുണ്ട്.