ആർട്ടിഫിഷ്യൽ ഇന്റലിജൻസ് (AI) രംഗത്ത് ഗൂഗിൾ വികസിപ്പിച്ച ഏറ്റവും പുതിയ മോഡലായ 'ജെമനൈ 3.5 പ്രോ'യുടെ (Gemini 3.5 Pro) അവതരണം വീണ്ടും നീട്ടിവെച്ചതായി റിപ്പോർട്ട്. ജൂൺ മാസത്തിൽ മോഡൽ പുറത്തിറക്കുമെന്ന് ഗൂഗിൾ വാർഷിക ഡെവലപ്പർ സമ്മേളനത്തിൽ സി.ഇ.ഒ സുന്ദർ പിച്ചൈ പ്രഖ്യാപിച്ചിരുന്നെങ്കിലും, പുതിയ റിപ്പോർട്ടുകൾ പ്രകാരം റിലീസ് ജൂലൈ മാസത്തിലേക്ക് നീളുമെന്നാണ് സൂചന.

ആദ്യഘട്ട പരീക്ഷണ ഉപയോക്താക്കളിൽ നിന്നുള്ള പ്രതികരണങ്ങൾ (Feedback) ശേഖരിച്ച് മോഡലിന്റെ പ്രകടനം കൂടുതൽ മെച്ചപ്പെടുത്തുന്നതിനാണ് ഈ താമസമെന്നാണ് വിവരം. അതേസമയം, റിലീസ് വൈകുന്നതുമായി ബന്ധപ്പെട്ട വാർത്തകളോട് ഗൂഗിൾ ഇതുവരെ ഔദ്യോഗികമായി പ്രതികരിച്ചിട്ടില്ല. നിലവിൽ ഗൂഗിളിന്റെ ആന്റിഗ്രാവിറ്റി പ്ലാറ്റ്‌ഫോം, എ.ഐ ബെഞ്ച്മാർക്കിങ് വെബ്‌സൈറ്റായ എൽ.എം അറീന (LM Arena) എന്നിവ വഴി തിരഞ്ഞെടുത്ത ഉപയോക്താക്കൾക്ക് ഈ മോഡൽ പരീക്ഷണാടിസ്ഥാനത്തിൽ ലഭ്യമാക്കിയിട്ടുണ്ട്.

ലഭിക്കുന്ന ഫീഡ്ബാക്കുകൾ അടിസ്ഥാനമാക്കി, സങ്കീർണ്ണവും ദൈർഘ്യമേറിയതുമായ ജോലികൾ കൂടുതൽ കൃത്യതയോടെ കൈകാര്യം ചെയ്യാൻ ജെമനൈ 3.5 പ്രോയെ സജ്ജമാക്കുകയാണ് കമ്പനിയുടെ ലക്ഷ്യം. അടുത്തിടെ പുറത്തിറക്കിയ ജെമനൈ 3.5 ഫ്ലാഷ് മോഡലിൽ നിന്നുള്ള ഉപയോക്തൃ പ്രതികരണങ്ങൾ കൂടി വിലയിരുത്തിയാണ് ഗൂഗിൾ പുതിയ പ്രോ പതിപ്പ് ഒരുക്കുന്നത്.