താൽക്കാലിക നിയന്ത്രണങ്ങൾ പൂർണ്ണമായി നീക്കിക്കൊണ്ട് ദുബായിലെ രണ്ട് പ്രമുഖ കത്തോലിക്കാ ദേവാലയങ്ങൾ വിശ്വാസികൾക്കായി തുറന്നുനൽകി. ഔദ്യോഗിക നിർദ്ദേശങ്ങളെത്തുടർന്ന് ഊദ് മേത്തയിലെ സെന്റ് മേരീസ് കത്തോലിക്കാ പള്ളിയും ജബൽ അലിയിലെ സെന്റ് ഫ്രാൻസിസ് ഓഫ് അസീസി കത്തോലിക്കാ പള്ളിയുമാണ് സാധാരണ നിലയിലേക്ക് മടങ്ങുന്നത്. ഇതോടെ പള്ളികളിലെ മുഴുവൻ പ്രാർത്ഥനകളിലും മറ്റ് അനുബന്ധ പ്രവർത്തനങ്ങളിലും വിശ്വാസികൾക്ക് നേരിട്ട് പങ്കാളികളാകാം.

കമ്യൂണിറ്റി ഡെവലപ്‌മെന്റ് അതോറിറ്റിയുടെ (CDA) പുതിയ അറിയിപ്പ് പ്രകാരം ജൂലൈ ഒന്ന് മുതൽ പള്ളി നൂറ് ശതമാനവും തുറന്നുപ്രവർത്തിക്കുമെന്ന് സെന്റ് മേരീസ് ചർച്ച് ഇടവക വികാരി ഫാ. ലെനി സുപെ എസ്കലാഡ അറിയിച്ചു. അധികൃതരുടെ നിർദ്ദേശങ്ങൾ പാലിച്ച് പള്ളിയിലെ മുഴുവൻ ശുശ്രൂഷകളും പുനരാരംഭിക്കുന്നതായി ജബൽ അലി ചർച്ചും സമൂഹമാധ്യമങ്ങളിലൂടെ വ്യക്തമാക്കിയിട്ടുണ്ട്. ദേവാലയത്തിലേക്ക് മടങ്ങിയെത്തുന്ന വിശ്വാസികൾ പരസ്പര ബഹുമാനത്തോടെയും കരുതലോടുകൂടിയും പെരുമാറണമെന്നും നിലവിലുള്ള മാർഗ്ഗനിർദ്ദേശങ്ങൾ പാലിക്കണമെന്നും പള്ളി അധികൃതർ ഓർമ്മിപ്പിച്ചു.

സുരക്ഷാ മുൻകരുതലുകളുടെ ഭാഗമായി കഴിഞ്ഞ ഏപ്രിൽ മാസം മുതൽ പള്ളിക്ക് പുറത്തുള്ള കൂട്ടായ്മകൾക്കും മറ്റ് ആത്മീയ പ്രവർത്തനങ്ങൾക്കും നിയന്ത്രണമേർപ്പെടുത്തിയിരുന്നു. കൂടാതെ വാരാന്ത്യ കുർബാനകളിൽ പങ്കെടുക്കുന്നതിന് 18 വയസ്സിന് മുകളിലുള്ളവർക്ക് ഓൺലൈൻ റജിസ്ട്രേഷൻ നിർബന്ധമാക്കുകയും കുട്ടികൾക്ക് പ്രവേശനം വിലക്കുകയും ചെയ്തിരുന്നു. ഈ നിയന്ത്രണങ്ങളാണ് ഇപ്പോൾ പൂർണ്ണമായി നീക്കിയത്.