ചൈനീസ് കമ്പനികളുടെ വിദേശത്തുള്ള ഉപകമ്പനികൾക്കും (Subsidiaries) അത്യാധുനിക എ.ഐ ചിപ്പുകൾ നൽകുന്നതിന് കടുത്ത നിയന്ത്രണങ്ങൾ ഏർപ്പെടുത്തി അമേരിക്ക. നിലവിലുള്ള കയറ്റുമതി നിയന്ത്രണങ്ങളിലെ പഴുതുകൾ പൂർണ്ണമായും അടയ്ക്കുന്നതിന്റെ ഭാഗമായാണ് യു.എസ് വാണിജ്യ വകുപ്പ് പുതിയ മാർഗ്ഗനിർദ്ദേശങ്ങൾ പുറത്തിറക്കിയത്.

ചൈനയിൽ ആസ്ഥാനമോ മാതൃകമ്പനിയോ ഉള്ള എല്ലാ ബിസിനസ്സ് സ്ഥാപനങ്ങൾക്കും വിദേശ ശാഖകൾ വഴിയും അത്യാധുനിക എ.ഐ ചിപ്പുകൾ കൈമാറണമെങ്കിൽ ഇനി മുതൽ പ്രത്യേക ലൈസൻസ് നിർബന്ധമാണെന്ന് യു.എസ് ബ്യൂറോ ഓഫ് ഇൻഡസ്ട്രി ആൻഡ് സെക്യൂരിറ്റി (BIS) അറിയിച്ചു. നിലവിലുള്ള കയറ്റുമതി നിബന്ധനകൾ കമ്പനികൾ കൃത്യമായി പാലിക്കുന്നുണ്ടെന്ന് ഉറപ്പാക്കാനാണ് ഈ പുതിയ നടപടിയെന്ന് അധികൃതർ വ്യക്തമാക്കി.

ട്രംപ് ഭരണകൂടത്തിന്റെ പുതിയ മാറ്റം

മുമ്പ് ബൈഡൻ ഭരണകൂടം കൊണ്ടുവന്നിരുന്ന 'ഫ്രെയിംവർക്ക് ഫോർ ആർട്ടിഫിഷ്യൽ ഇന്റലിജൻസ് ഡിഫ്യൂഷൻ' (Framework for Artificial Intelligence Diffusion) ട്രംപ് ഭരണകൂടം റദ്ദാക്കിയിരുന്നു. ഇതിനുപിന്നാലെ കയറ്റുമതി നിയന്ത്രണങ്ങളിൽ ചില അവ്യക്തതകൾ ഉണ്ടായതായും ഇതോടെ വിദേശ ശാഖകൾ വഴി ഇത്തരം ചിപ്പുകൾ ചൈനീസ് കമ്പനികൾക്ക് സുഗമമായി ലഭിക്കാൻ വഴിയൊരുങ്ങിയതായും കണ്ടെത്തിയിരുന്നു. ഇത് അമേരിക്കയുടെ ദേശീയ സുരക്ഷയ്ക്ക് വലിയ ഭീഷണിയാണെന്ന വിമർശനം ഉയർന്ന സാഹചര്യത്തിലാണ് ഇപ്പോൾ പുതിയ കർശന നടപടികളിലേക്ക് യു.എസ് കടന്നിരിക്കുന്നത്.

മാർഗ്ഗനിർദ്ദേശങ്ങൾ പാലിക്കുമെന്ന് എൻവിഡിയ

യു.എസിന്റെ പുതിയ മാർഗ്ഗനിർദ്ദേശങ്ങൾ പൂർണ്ണമായി പാലിച്ച് മാത്രമേ മുന്നോട്ടുപോകൂ എന്ന് പ്രമുഖ അമേരിക്കൻ ചിപ്പ് ഭീമനായ എൻവിഡിയ (Nvidia) വ്യക്തമാക്കിയിട്ടുണ്ട്. അതേസമയം, ഈ വിഷയത്തിൽ പ്രതികരിക്കാൻ എ.എം.ഡി (AMD), ഇന്റൽ (Intel) തുടങ്ങിയ മറ്റ് പ്രമുഖ ചിപ്പ് നിർമ്മാണ കമ്പനികൾ തയ്യാറായിട്ടില്ല. ആഗോളതലത്തിൽ ആർട്ടിഫിഷ്യൽ ഇന്റലിജൻസ് സാങ്കേതികവിദ്യയിൽ ആധിപത്യം സ്ഥാപിക്കാൻ അമേരിക്കയും ചൈനയും തമ്മിൽ കടുത്ത പോരാട്ടം തുടരുന്നതിനിടയിലാണ് യു.എസിന്റെ ഭാഗത്തുനിന്നും ഈ സുപ്രധാന തീരുമാനം ഉണ്ടായിരിക്കുന്നത്.