ആഫ്രിക്കൻ ഭൂഖണ്ഡത്തിലേക്കുള്ള തങ്ങളുടെ ശൃംഖല വിപുലീകരിക്കുന്നതിന്റെ ഭാഗമായി കൂടുതൽ സർവീസുകളും വിമാന സർവീസ് പുനരാരംഭിക്കലും പ്രഖ്യാപിച്ച് ഖത്തർ എയർവേയ്‌സ്. ജൂൺ 16 മുതൽ ഘട്ടഘട്ടമായാണ് പുതിയ സർവീസുകൾ പ്രാബല്യത്തിൽ വരിക.

ആഫ്രിക്കയിലുടനീളമുള്ള കണക്റ്റിവിറ്റി വർദ്ധിപ്പിക്കുന്നതിന്റെ ഭാഗമായി ജൂൺ 16 മുതൽ സീഷെൽസിലേക്ക് (Seychelles) ആഴ്ചയിൽ നാല് സർവീസുകളും, കിഗാലിയിലേക്ക് (Kigali) ആഴ്ചയിൽ രണ്ട് സർവീസുകളും എയർലൈൻ പുനരാരംഭിക്കും. കൂടാതെ ജൂലൈ 1 മുതൽ മരാക്കേഷിലേക്ക് (Marrakesh) പ്രതിദിന സർവീസും ആരംഭിക്കുന്നതാണ്.

യാത്രക്കാർക്ക് കൂടുതൽ സൗകര്യപ്രദമായ യാത്രാ ഓപ്ഷനുകൾ ഉറപ്പാക്കുന്നതിനായി നിലവിലുള്ള താഴെ പറയുന്ന റൂട്ടുകളിലെ പ്രതിവാര സർവീസുകളുടെ എണ്ണവും വർദ്ധിപ്പിച്ചിട്ടുണ്ട്:

• അലക്സാണ്ട്രിയ: ആഴ്ചയിൽ 3 സർവീസുകളിൽ നിന്ന് 7 ആയി വർദ്ധിപ്പിച്ചു.
• കെയ്‌റോ: ആഴ്ചയിൽ 28 സർവീസുകളിൽ നിന്ന് 35 ആയി വർദ്ധിപ്പിച്ചു.
• കേപ് ടൗൺ: ആഴ്ചയിൽ 7 സർവീസുകളിൽ നിന്ന് 10 ആയി വർദ്ധിപ്പിച്ചു.
• ദാർ എസ് സലാം (DAR): ആഴ്ചയിൽ 3 സർവീസുകളിൽ നിന്ന് 7 ആയി വർദ്ധിപ്പിച്ചു.
• ലുസാക്ക - ഹരാരെ: ആഴ്ചയിൽ 5 സർവീസുകളിൽ നിന്ന് 7 ആയി വർദ്ധിപ്പിച്ചു.
• മാപുട്ടോ - ഡർബൻ: ആഴ്ചയിൽ 4 സർവീസുകളിൽ നിന്ന് 7 ആയി വർദ്ധിപ്പിച്ചു.

പോർട്ട് സുഡാനിലേക്ക് പുതിയ സർവീസ്

ഇതിനുപുറമെ, ജൂലൈ 2 മുതൽ സുഡാനിലെ പോർട്ട് സുഡാനിലേക്ക് (Port Sudan) ആഴ്ചയിൽ മൂന്ന് പുതിയ സർവീസുകൾ കൂടി എയർലൈൻ ആരംഭിക്കും. ഒമാൻ, പാകിസ്ഥാൻ തുടങ്ങിയ പശ്ചിമേഷ്യൻ, തെക്കുകിഴക്കൻ ഏഷ്യൻ വിപണികളിൽ നിന്ന് പോർട്ട് സുഡാനിലേക്ക് യാത്ര ചെയ്യുന്നവർക്ക് ദോഹ ഹമദ് അന്താരാഷ്ട്ര വിമാനത്താവളം വഴി എളുപ്പത്തിൽ കണക്റ്റിംഗ് ഫ്ലൈറ്റുകൾ ലഭ്യമാകും.

എല്ലാ ചൊവ്വ, വ്യാഴം, ശനി ദിവസങ്ങളിലായിരിക്കും പോർട്ട് സുഡാൻ സർവീസുകൾ. ദോഹയിൽ നിന്ന് രാവിലെ 9 മണിക്ക് പുറപ്പെടുന്ന QR1319 വിമാനം 11 മണിക്ക് പോർട്ട് സുഡാനിലെത്തും. തിരികെ പോർട്ട് സുഡാനിൽ നിന്ന് ഉച്ചയ്ക്ക് 12.25-ന് പുറപ്പെടുന്ന QR1320 വിമാനം വൈകുന്നേരം 4.20-ന് ദോഹയിലെത്തും. ആഗോള കണക്റ്റിവിറ്റി കൂടുതൽ ശക്തമാക്കുന്നതിനൊപ്പം വർദ്ധിച്ചുവരുന്ന വ്യോമയാന-വ്യാപാര ആവശ്യങ്ങളെ പിന്തുണയ്ക്കുക കൂടിയാണ് ഈ വിപുലീകരണത്തിലൂടെ ഖത്തർ എയർവേയ്‌സ് ലക്ഷ്യമിടുന്നത്.