ഡൽഹിയിൽ വായു മലിനീകരണം നിയന്ത്രണവിധേയമായതോടെ സ്കൂളുകൾ നാളെ മുതൽ വീണ്ടും തുറക്കുന്നു. നിലവിൽ, വായു നിലവാരം സൂചിക മെച്ചപ്പെട്ട നിലയിലാണ്. എന്നാൽ, ഒരാഴ്ചത്തേക്ക് സ്കൂൾ അസംബ്ലികൾക്കും, ഔട്ട്ഡോർ കായിക പരിപാടികൾക്കും വിലക്ക് ഏർപ്പെടുത്തിയിട്ടുണ്ട്. വായു നിലവാരം അതിരൂക്ഷമായതിനെ തുടർന്ന് നവംബർ 9 മുതൽ 18 വരെ ഡൽഹിയിലെ മുഴുവൻ സ്കൂളുകൾക്കും സർക്കാർ ശൈത്യകാല അവധി നൽകുകയായിരുന്നു.

വായു മലിനീകരണത്തെ നേരിയ തോതിൽ പിടിച്ചുകെട്ടാൻ കഴിഞ്ഞതോടെ ഗ്രേഡഡ് റെസ്പോൺസ് ആക്ഷൻ പ്ലാൻ പ്രകാരം, ഏർപ്പെടുത്തിയിരുന്ന നിയന്ത്രണങ്ങൾക്കും ഡൽഹിയിൽ ഇളവുകൾ നൽകിയിട്ടുണ്ട്. ഇന്നലെ വായു നിലവാര സൂചിക 128 പോയിന്റോളമാണ് താഴ്ന്നത്. ഇത് കണക്കിലെടുത്താണ് കമ്മീഷൻ ഫോർ എയർ ക്വാളിറ്റി മാനേജ്മെന്റിന്റെ നടപടി.