ഇന്ത്യയും പാകിസ്ഥാനും വെടിനിർത്തൽ പ്രഖ്യാപിച്ചതിന് പിന്നാലെ  ദില്ലി വിമാനത്താവളത്തിൻറെ പ്രവർത്തനം സാധാരണനിലയിൽ തുടരുമെന്ന് അറിയിപ്പ്. ദില്ലി വിമാനത്താവളത്തിൻറെ പ്രവർത്തനം സുഗമമായി തുടരും. എന്നാൽ, അതിർത്തി പ്രശ്‌നങ്ങൾ കാരണം വ്യോമയാന മന്ത്രാലയത്തിൻറെ ശക്തമായ സുരക്ഷാ പ്രോട്ടോക്കോളുകൾ നിലവിലുള്ളതിനാൽ വിമാനങ്ങളുടെ സമയക്രമത്തിൽ മാറ്റമുണ്ടായേക്കും. ചെക്ക്-ഇന്നിനായി പതിവിൽക്കൂടുതൽ സമയം വേണ്ടിവന്നേക്കുമെന്നും ദില്ലി ഇൻറർനാഷണൽ എയർപോർട്ട് ലിമിറ്റഡ് (DIAL) അറിയിച്ചു.  

ദില്ലി വിമാനത്താവള അധികൃതർ പുതിയ മാർ​ഗനിർദേശങ്ങൾ പുറത്തിറക്കിയിട്ടുണ്ട്. സുരക്ഷ വർദ്ധിപ്പിച്ചതും, നിലവിലെ സാഹചര്യങ്ങളും വിമാനങ്ങളുടെ സമയത്തെയും, മറ്റ് നടപടികളെയും ബാധിച്ചേക്കാം. നിരന്തരം ഔദ്യോ​ഗിക അറിയിപ്പുകൾ പരിശോധിക്കണം. നടപടികളുമായി യാത്രക്കാർ സഹകരിക്കണമെന്നും അധികൃത‌ർ നിർദ്ദേശിച്ചു. പഹൽഗാം ഭീകരാക്രമണത്തിന്‌ പിന്നാലെയുണ്ടായ ഇന്ത്യ–പാകിസ്ഥാൻ സംഘർഷത്തെ തുടർന്ന്‌ രാജ്യത്തെ 32 വിമാനത്താവളങ്ങൾ നേരത്തെ അടച്ചിരുന്നു. അതിർത്തി പ്രദേശങ്ങളിലുള്ള വിമാനത്താവളങ്ങളാണ് അടച്ചത്. നിലവിൽ വെടിനിർത്തൽ പ്രഖ്യാപിച്ചെങ്കിലും ഈ വിമാനത്താവളങ്ങൾ തുറക്കുന്നതിൽ തീരുമാനമായിട്ടില്ല.