ഗുസ്തിതാരങ്ങളായ വിനേഷ് ഫോ​ഗട്ടും ബജ്റം​ഗ് പുനിയയും വരാനിരിക്കുന്ന ഹരിയാന നിയമസഭാ തിരഞ്ഞെടുപ്പിൽ മത്സരിക്കുമെന്ന് റിപ്പോർട്ട്. കോൺ​ഗ്രസ് സ്ഥാനാർഥികളായിട്ടായിരിക്കും ഇരുവരും ജനവിധി തേടുക. പാർട്ടിയിൽ അം​ഗത്വം സ്വീകരിക്കുന്നതിന് മുന്നോടിയായി ഇരുവരും പ്രതിപക്ഷനേതാവ് രാഹുൽ ​ഗാന്ധിയുമായി കൂടിക്കാഴ്ച നടത്തി. കൂടിക്കാഴ്ചയുടെ ചിത്രങ്ങൾ കോൺ​ഗ്രസ് ഔദ്യോ​ഗികമായി പുറത്തുവിട്ടിട്ടുണ്ട്. ജുലാന സീറ്റിൽ വിനേഷ് ഫോഗട്ട് മത്സരിച്ചേക്കുമെന്നാണ് എൻ.ഡി.ടി.വി റിപ്പോർട്ട് ചെയ്യുന്നത്. അതേസമയം, ബജ്റം​ഗ് പുനിയ ബാഡ്ലി സീറ്റിൽനിന്ന് ജനവിധി തേടിയേക്കും.

വിനേഷ് ഫോഗട്ട് സജീവരാഷ്ട്രീയത്തിലേക്ക് പ്രവേശിക്കാനൊരുങ്ങുന്നതായി നേരത്തെ റിപ്പോർട്ടുകളുണ്ടായിരുന്നു. ഒളിമ്പിക്‌സിന് ശേഷം പാരീസില്‍നിന്ന് നാട്ടിലേക്ക് തിരിച്ചെത്തിയ താരത്തിന് ഉജ്ജ്വല സ്വീകരണമാണ് ലഭിച്ചത്. കോൺഗ്രസ് നേതാവും എം.പിയുമായ ദീപേന്ദ്ര ഹൂഡയുടെ നേതൃത്വത്തിലായിരുന്നു വിനേഷിന് സ്വീകരണം നൽകിയത്.