കെ.എസ്.യു പ്രതിഷേധത്തിനിടെ കഴുത്തിന് പരിക്കേറ്റ ആരോഗ്യമന്ത്രി വീണാ ജോർജ് പരിയാരം മെഡിക്കൽ കോളേജിൽ നിന്ന് ഡിസ്ചാർജ് ആയി. വെള്ളിയാഴ്ച പുലർച്ചെ നാല് മണിയോടെ ആശുപത്രി വിട്ട മന്ത്രി, ഔദ്യോഗിക വാഹനത്തിൽ റോഡ് മാർഗം തിരുവനന്തപുരത്തേക്ക് തിരിച്ചു. തുടർചികിത്സ തിരുവനന്തപുരം മെഡിക്കൽ കോളേജിൽ നടക്കും. കശേരുക്കൾക്കിടയിലുള്ള ഡിസ്കുകൾ നാഡികളിൽ സമ്മർദം ചെലുത്തുന്നതിനാലാണ് കടുത്ത വേദന അനുഭവപ്പെടുന്നതെന്ന് എം.ആർ.ഐ റിപ്പോർട്ടുകൾ വ്യക്തമാക്കുന്നു. നിലവിൽ ശസ്ത്രക്രിയയുടെ ആവശ്യമില്ലെന്നാണ് ഡോക്ടർമാരുടെ വിലയിരുത്തൽ.

അതേസമയം, ഈ സംഭവത്തെച്ചൊല്ലി സി.പി.എമ്മും കോൺഗ്രസും തമ്മിലുള്ള രാഷ്ട്രീയ പോര് അതിരൂക്ഷമായി തുടരുകയാണ്. മന്ത്രിയെ അപായപ്പെടുത്താൻ കെ.എസ്.യു ആസൂത്രിതമായി നടത്തിയ അക്രമമാണിതെന്ന് സി.പി.എം ആരോപിക്കുമ്പോൾ, ഇത് വെറും 'കപടനാടകം' മാത്രമാണെന്നാണ് കോൺഗ്രസിന്റെ വാദം. അക്രമം നടന്നിട്ടുണ്ടെങ്കിൽ അതിന്റെ ദൃശ്യങ്ങൾ പുറത്തുവിടാൻ കോൺഗ്രസ് നേതാക്കൾ വെല്ലുവിളിക്കുന്നു. സൈബറിടത്തിലും തെരുവിലും ഈ വിഷയം വലിയ പ്രതിഷേധങ്ങൾക്കും ആരോപണ പ്രത്യാരോപണങ്ങൾക്കും കാരണമായിട്ടുണ്ട്.

മന്ത്രിയുടെ ആരോഗ്യനിലയിൽ പുരോഗതിയുണ്ടെങ്കിലും വേദന തുടരുന്നതിനാൽ കുറച്ചുദിവസം കൂടി വിശ്രമം വേണ്ടിവരുമെന്നാണ് മെഡിക്കൽ ബോർഡ് അറിയിച്ചിരിക്കുന്നത്.