'തീ അണക്കാൻ കഴിഞ്ഞത് അഭിമാനകരമായ നേട്ടം'; ബ്രഹ്‌മപുരവും അലബാമയും താരതമ്യപ്പെടുത്തി പി. രാജീവ്

  1. Home
  2. Trending

'തീ അണക്കാൻ കഴിഞ്ഞത് അഭിമാനകരമായ നേട്ടം'; ബ്രഹ്‌മപുരവും അലബാമയും താരതമ്യപ്പെടുത്തി പി. രാജീവ്

p rajeev


കൊച്ചി ബ്രഹ്‌മപുരം മാലിന്യ പ്ലാന്റിലെ തീപ്പിടിത്തത്തെ അമേരിക്കയിലെ അലബാമയിലെ മാലിന്യമലയ്ക്ക് തീപ്പിടിച്ചതുമായി താരതമ്യപ്പെടുത്തി മന്ത്രി പി. രാജീവ്. അലബാമയിലെ തീപ്പിടിത്തം ഇപ്പോഴും അണക്കാൻ സാധിച്ചിട്ടില്ല. എന്നാൽ, ബ്രഹ്‌മപരുത്തെ തീയണയ്ക്കാൻ കഴിഞ്ഞത് അഭിമാനകരമായ നേട്ടമാണെന്നും മന്ത്രി അവകാശപ്പെട്ടു.

'തീ അണഞ്ഞത് പ്രതിപക്ഷത്തെ അലോസരപ്പെടുത്തുകയോ ദുഃഖിപ്പിക്കുകയോ ചെയ്യുന്നു. എല്ലാ വിഭാഗങ്ങളും ചേർന്ന് തീ അണക്കാൻ കഴിഞ്ഞത് അഭിമാനകരമായ നേട്ടമാണ്. അമേരിക്കയിലെ അലബാമയിൽ നവംബറിൽ 13 ഏക്കറിലെ മാലിന്യമലയ്ക്ക് തീപ്പിടിച്ചിട്ട് വീണ്ടും അവിടെ ഇപ്പോഴും തീ വരുന്നതിനെക്കുറിച്ച് അമേരിക്കൻ മാധ്യമങ്ങൾ റിപ്പോർട്ട് ചെയ്തിട്ടുണ്ട്.', പി. രാജീവ് പറഞ്ഞു.

തീ പടർന്ന് അത് അണച്ചുകഴിഞ്ഞ സന്ദർഭത്തിൽ, അതിൽ പങ്കെടുത്ത മുഴുവൻ ആളുകളേയും അഭിനന്ദിക്കുന്ന നിലപാടായിരുന്നു പ്രതിപക്ഷം സ്വീകിരിക്കേണ്ടിയിരുന്നത്. അതിന് പകരം പ്രതിഷേധിച്ച് ഇറങ്ങിപ്പോയത് തെറ്റാണ്. അടിയന്തരപ്രമേയ നോട്ടീസ് വായിച്ചാൽ തന്നെ അതിലെ പൊള്ളത്തരം മനസ്സിലാകും. അങ്ങേയറ്റം ലജ്ജാകരമാണ് പ്രതിപക്ഷത്തിന്റെ സമീപനം. മറുപടിക്ക് നിൽക്കാതെ അവർ പോയി. മറുപടി പറയാൻ മന്ത്രിയെ തിരഞ്ഞെടുക്കുന്നതിൽ എന്തോ തർക്കമുണ്ടായെന്നാണ് മനസ്സിലായത്. ആ തർക്കം ബഹളമായിട്ട് ഇറങ്ങിപ്പോയതാണെന്നാണ് തോന്നുന്നത്. അതാണ് അവരുടെ രീതിയെന്നും മന്ത്രി പ്രതിപക്ഷത്തെ പരിഹസിച്ചു.