ഉപതിരഞ്ഞെടുപ്പ് ചൂടിലായിരിക്കുന്ന പാലക്കാട് മണ്ഡലത്തിൽ വോട്ടിന് വേണ്ടി പണം നൽകിയെന്ന ആരോപണത്തിൽ എൻഡിഎ പ്രതിനിധികൾക്കെതിരെ പോലീസ് കേസെടുത്തു. കണ്ടാലറിയാവുന്ന എൻഡിഎ പ്രവർത്തകർക്കെതിരെ ജനപ്രാതിനിധ്യ നിയമത്തിലെ വിവിധ വകുപ്പുകൾ പ്രകാരമാണ് പാലക്കാട് ടൗൺ പോലീസ് എഫ്‌ഐആർ രജിസ്റ്റർ ചെയ്തിരിക്കുന്നത്. പണം നൽകി വോട്ടർമാരെ സ്വാധീനിക്കാൻ ശ്രമിച്ചു എന്നാണ് എഫ്‌ഐആറിലെ പ്രധാന ആരോപണം.

കണ്ണാടി തരുവക്കുറിശ്ശി ഭാഗത്ത് എൻഡിഎ സ്ഥാനാർത്ഥി ശോഭാ സുരേന്ദ്രനൊപ്പം എത്തിയ പ്രവർത്തകർ പണം വിതരണം ചെയ്തതായി കോൺഗ്രസ് ആരോപിച്ചിരുന്നു. ഇതിന്റെ ദൃശ്യങ്ങൾ കോൺഗ്രസ് പുറത്തുവിട്ടതിന് പിന്നാലെയാണ് പോലീസ് നടപടി. നിശബ്ദ പ്രചാരണ ദിവസം പണം വിതരണം ചെയ്ത് വോട്ടർമാരെ സ്വാധീനിക്കാൻ ബിജെപി ശ്രമിച്ചുവെന്നാണ് യുഡിഎഫ് ഉന്നയിക്കുന്ന ആരോപണം.

അതേസമയം, തനിക്കെതിരെയുള്ള ആരോപണങ്ങൾ കെട്ടിച്ചമച്ചതാണെന്നും തന്നെ കുടുക്കാൻ മനഃപൂർവ്വമായ ശ്രമം നടക്കുന്നുണ്ടെന്നും ശോഭാ സുരേന്ദ്രൻ പ്രതികരിച്ചു. പ്രചാരണത്തിനിടെ തന്നെ പിന്തുടർന്ന വാഹനത്തിലുണ്ടായിരുന്നവർ ലൈംഗികാധിക്ഷേപം നടത്തിയെന്നും, പണം നൽകി എന്ന് പറയപ്പെടുന്ന സ്ത്രീയെ തനിക്ക് അറിയില്ലെന്നും അവർ വ്യക്തമാക്കി. തിരഞ്ഞെടുപ്പ് ചട്ടങ്ങൾ ലംഘിച്ചിട്ടില്ലെന്നും തന്നെ അപമാനിക്കാൻ ശ്രമിച്ചവർക്കെതിരെ പോലീസിനും തിരഞ്ഞെടുപ്പ് കമ്മീഷനും പരാതി നൽകുമെന്നും ശോഭാ സുരേന്ദ്രൻ പറഞ്ഞു.