'ഞാൻ ധരിക്കുന്നത് വെള്ള ടിഷര്ട്ട് മാത്രം; മോദിയുടേത് ലക്ഷങ്ങള് വിലയുള്ള സ്യൂട്ടുകള്: പരിഹസിച്ച് രാഹുൽ ഗാന്ധി
പ്രധാനമന്ത്രി നരേന്ദ്ര മോദി ധരിക്കുന്നത് ലക്ഷങ്ങള് വിലയുള്ള സ്യൂട്ടുകളാണെന്നും താന് ഈ വെള്ള ടി-ഷര്ട്ട് മാത്രമാണ് ഉപയോഗിക്കുന്നതെന്നും കോണ്ഗ്രസ് നേതാവും എം.പി.യുമായ രാഹുല് ഗാന്ധി. മധ്യപ്രദേശിലെ സത്നയില് തിരഞ്ഞെടുപ്പ് റാലിയെ അഭിസംബോധന ചെയ്യുന്നതിനിടെയായിരുന്നു പരാമര്ശം.
'മോദിയുടെ പ്രസംഗം ഞാന് കേട്ടു, എല്ലായിടത്തുവെച്ചും, എല്ലാ പ്രസംഗത്തിലും ഞാന് ഒ.ബി.സി. വിഭാഗത്തില്പ്പെട്ടയാളാണെന്നാണ് മോദി പറയുന്നത്. ഇത് ആവര്ത്തിച്ചു പറഞ്ഞാണ് അദ്ദേഹം പ്രധാനമന്ത്രിയായത്. ലക്ഷങ്ങള് വിലയുള്ള 1-2 സ്യൂട്ടുകളെങ്കിലും മോദി ഒരു ദിവസം ധരിക്കുന്നുണ്ട്. ഞാന് ഈയൊരു വെള്ള വസ്ത്രമാണ് ധരിക്കുത്', രാഹുല് പറഞ്ഞു.
ജാതി അടിസ്ഥാനമാക്കിയുള്ള സെന്സസിനെക്കുറിച്ച് താന് പറഞ്ഞുതുടങ്ങിയപ്പോള് മോദിയുടെ പ്രസംഗങ്ങളില്നിന്ന് ജാതി പോയെന്നും രാഹുല് തുറന്നടിച്ചു. താന് ജാതിയെക്കുറിച്ച് പറയുമ്പോള്, ഇന്ത്യയില് ജാതിയില്ലെന്നാണ് മോദി പറയുന്നത്. ജാതി സെന്സസ് നടത്തലായിരിക്കും മധ്യപ്രദേശിൽ അധികാരത്തിലെത്തുന്ന കോണ്ഗ്രസ് സര്ക്കാരിന്റെ ആദ്യ നടപടിയെന്നും രാഹുല് വ്യക്തമാക്കി.