സൗദി അറേബ്യയിലെ സ്വകാര്യ മേഖലയിലെ പ്രൊക്യൂർമെന്റ് (പർച്ചേസിങ്) തസ്തികകളിൽ 70 ശതമാനം സ്വദേശിവത്കരണം (സൗദിവത്കരണം) ഏർപ്പെടുത്താനുള്ള സുപ്രധാന തീരുമാനം മാനവ വിഭവശേഷി മന്ത്രാലയം നടപ്പാക്കി തുടങ്ങി. മെയ് 31 മുതലാണ് ഈ പുതിയ നിയമം രാജ്യത്ത് ഔദ്യോഗികമായി പ്രാബല്യത്തിൽ വന്നത്. സൗദി സ്റ്റാൻഡേർഡ് ക്ലാസിഫിക്കേഷൻ ഓഫ് ഒക്യുപേഷനുകളുടെ അംഗീകൃത നിർവചനങ്ങൾക്ക് കീഴിൽ വരുന്നതും, മൂന്നോ അതിലധികമോ ജീവനക്കാരുള്ളതുമായ എല്ലാ സ്ഥാപനങ്ങൾക്കും പുതിയ നിബന്ധന ബാധകമായിരിക്കും.

പ്രധാനപ്പെട്ട 12 തസ്തികകൾ സ്വദേശിവത്കരണ പരിധിയിൽ

പർച്ചേസിങ്, ലോജിസ്റ്റിക്സ് രംഗത്തെ പ്രധാനപ്പെട്ട 12 തൊഴിൽ ശീർഷകങ്ങളാണ് (Job Titles) ഈ തീരുമാനത്തിന്റെ പരിധിയിൽ വരുന്നത്. പ്രൊക്യുർമെന്റ് മാനേജർ, പ്രൊക്യുർമെന്റ് പ്രതിനിധി, കോൺട്രാക്ട് മാനേജർ, വെയർഹൗസ് കീപ്പർ, ലോജിസ്റ്റിക്സ് മാനേജർ, വെയർഹൗസ് മാനേജർ, ടെൻഡർ സ്പെഷ്യലിസ്റ്റ്, പ്രൊക്യുർമെന്റ് സ്പെഷ്യലിസ്റ്റ്, ഇ-കൊമേഴ്‌സ് സ്പെഷ്യലിസ്റ്റ്, മാർക്കറ്റ് റിസർച്ച് സ്പെഷ്യലിസ്റ്റ്, വെയർഹൗസ് സ്പെഷ്യലിസ്റ്റ്, പ്രൈവറ്റ് ലേബൽ സപ്ലൈ സ്പെഷ്യലിസ്റ്റ് എന്നിവയാണ് ഈ തസ്തികകൾ. സ്വകാര്യ സ്ഥാപനങ്ങളിൽ ഈ തസ്തികകളിൽ ജോലി ചെയ്യുന്ന പ്രവാസികൾക്ക് പുതിയ നിയമം വലിയ രീതിയിൽ ബാധകമാകും.

പരിശോധനകൾ തുടങ്ങി; നിയമലംഘകർക്കെതിരെ കർശന നടപടി

നിയമം ലക്ഷ്യമിടുന്ന സ്ഥാപനങ്ങൾ നിർദ്ദിഷ്ട സ്വദേശിവത്കരണ നിരക്കുകൾ കൃത്യമായി പാലിക്കുന്നുണ്ടോ എന്ന് ഉറപ്പുവരുത്താൻ മന്ത്രാലയത്തിന്റെ നേതൃത്വത്തിൽ രാജ്യവ്യാപകമായി ശക്തമായ പരിശോധനകൾ ഇതിനകം തന്നെ ആരംഭിച്ചുകഴിഞ്ഞു. സ്വദേശികൾക്ക് സുസ്ഥിരവും ഉൽപ്പാദനപരവുമായ തൊഴിൽ അന്തരീക്ഷം ഉറപ്പാക്കുകയാണ് ലക്ഷ്യം. നിശ്ചിത സമയപരിധിക്കുള്ളിൽ നിയമം നടപ്പാക്കാത്ത സ്ഥാപനങ്ങൾക്കെതിരെ സേവനങ്ങൾ റദ്ദാക്കൽ ഉൾപ്പെടെയുള്ള കർശനമായ നിയമനടപടികളും വൻ തുക പിഴയും ചുമത്തുമെന്ന് മന്ത്രാലയം കടുത്ത മുന്നറിയിപ്പ് നൽകിയിട്ടുണ്ട്.

ലക്ഷ്യം സ്വദേശി ഉദ്യോഗാർത്ഥികളുടെ പങ്കാളിത്തം വർദ്ധിപ്പിക്കൽ

രാജ്യത്തെ തൊഴിൽ വിപണി തന്ത്രത്തിന്റെ ലക്ഷ്യങ്ങൾ കൈവരിക്കുന്നതിനും പ്രൊക്യുർമെന്റ് മേഖലയിൽ സ്വദേശികളായ പൗരന്മാർക്ക് കൂടുതൽ തൊഴിലവസരങ്ങൾ ലഭ്യമാക്കുന്നതിനുമായി മന്ത്രാലയം നടത്തിവരുന്ന നിരന്തര ശ്രമങ്ങളുടെ ഭാഗമായാണ് ഈ നടപടി. ഭാവിയിലെ തൊഴിൽ വിപണി ആവശ്യങ്ങൾക്ക് അനുസൃതമായി യോഗ്യരായ സ്വദേശി ഉദ്യോഗാർത്ഥികളെ വാർത്തെടുക്കാനും, സ്വകാര്യ മേഖലയിലെ ഉയർന്ന നിലവാരമുള്ള ജോലികളിൽ അവരുടെ പങ്കാളിത്തം വർധിപ്പിക്കാനും പുതിയ തീരുമാനം വഴി സാധിക്കുമെന്നും മാനവ വിഭവശേഷി മന്ത്രാലയം വ്യക്തമാക്കുന്നു.