2026-ന്റെ ആദ്യ പകുതിയിൽ 18.2 ദശലക്ഷത്തോളം കസ്റ്റംസ് ഇടപാടുകൾ പൂർത്തിയാക്കി ദുബൈ കസ്റ്റംസിന്റെ എയർ കാർഗോ സെന്ററുകൾ മിന്നുന്ന നേട്ടം കൈവരിച്ചു. മുൻവർഷത്തെ 11.9 ദശലക്ഷവുമായി താരതമ്യം ചെയ്യുമ്പോൾ ഇടപാടുകളിൽ 53 ശതമാനത്തിന്റെ വളർച്ചയാണുണ്ടായിരിക്കുന്നത്. കൈകാര്യം ചെയ്ത ചരക്കിന്റെ ആകെ ഭാരം 47 ശതമാനം വർധിച്ച് 1.3 ദശലക്ഷം ടണ്ണിൽ എത്തിയതായും ഔദ്യോഗിക കണക്കുകൾ വ്യക്തമാക്കുന്നു.

ഓൺലൈൻ വ്യാപാരം കൂടുതൽ സുഗമമാക്കുന്നതിന്റെ ഭാഗമായി വിദേശത്തുനിന്നെത്തുന്ന ഇ-കൊമേഴ്‌സ് ഉൽപ്പന്നങ്ങൾക്ക് കസ്റ്റംസ് തീരുവ ഒഴിവാക്കുന്നതിനുള്ള തുകയുടെ പരിധി ഓഗസ്റ്റ് മൂന്നു മുതൽ 1,000 ദിർഹമായി ഉയർത്തിയിട്ടുണ്ട്. എന്നാൽ പുകയില ഉൽപ്പന്നങ്ങൾ, ഇ-സിഗരറ്റുകൾ, മദ്യം എന്നിവയ്ക്ക് ഈ ആനുകൂല്യം ലഭിക്കില്ല. ഇറക്കുമതി ചെയ്ത് 60 ദിവസത്തിനകം തിരിച്ചയക്കുന്ന ഉൽപ്പന്നങ്ങൾക്ക് അടച്ച തീരുവ മടക്കി നൽകുന്ന ആനുകൂല്യവും പ്രഖ്യാപിച്ചിട്ടുണ്ട്.

ഫ്രീ സോൺ ഡിപ്പാർട്ട്‌മെന്റ് വഴി 17.7 ദശലക്ഷം ഇടപാടുകളാണ് പൂർത്തിയാക്കിയത്. മുൻവർഷത്തെ അപേക്ഷിച്ച് 62 ശതമാനം വളർച്ചയാണിത്. കൂടാതെ 6.2 ദശലക്ഷത്തിലധികം തപാൽ പാഴ്‌സലുകളും ഈ കാലയളവിൽ കൈകാര്യം ചെയ്തു. കൃത്രിമബുദ്ധിയും (AI) അത്യാധുനിക സാങ്കേതികവിദ്യകളും ഉപയോഗിച്ചാണ് പരിശോധനകൾ വേഗത്തിലാക്കുന്നത്. ദുബൈ അന്താരാഷ്ട്ര വിമാനത്താവളത്തിലെ കാർഗോ വില്ലേജ്, അൽ മക്തൂം വിമാനത്താവളത്തിലെ എയർ കാർഗോ സെന്റർ എന്നിവ വഴി മെയ് മാസത്തിൽ മാത്രം പ്രതിദിനം 2.11 ദശലക്ഷം കിലോഗ്രാം ചരക്കുകൾ വരെ വിജയകരമായി ക്ലിയർ ചെയ്യാൻ ദുബൈ കസ്റ്റംസിന് സാധിച്ചു.