ഏപ്രിൽ ഒന്നിന് പുതിയ സാമ്പത്തിക വർഷം തുടങ്ങുന്നതിനാൽ എല്ലാ മേഖലയിലും തിരക്ക് വർധിക്കുന്ന മാസമാണ് മാർച്ച്. ഒരു സാമ്പത്തിക വർഷത്തിന്റെ അവസാനമായതുകൊണ്ട് മാർച്ചിൽ ചെയ്തു തീർക്കേണ്ട നിരവധി കാര്യങ്ങളുണ്ട്. നിക്ഷേപങ്ങളും ആദായ നികുതി റിട്ടേണുകളും അടക്കം ഈ കാര്യങ്ങളിൽ ഉൾപ്പെടും. മാർച്ച് 31-ന് അവസാനിക്കുന്നതിന് മുൻപ് ചെയ്യേണ്ട അഞ്ച് പ്രധാനപ്പെട്ട കാര്യങ്ങൾ ഇവയാണ്.

1)പാൻ-ആധാർ ലിങ്ക്
മാർച്ച് 31 ന് മുമ്പ് പാൻ കാർഡ് ആധാറുമായി ബന്ധിപ്പിച്ചില്ലെങ്കിൽ 1,000 രൂപ പിഴ ഈടാക്കുമെന്നാണ് കേന്ദ്ര സർക്കാർ അറിയിച്ചത്. ഇതോടൊപ്പം ഇവ രണ്ടും ലിങ്ക് ചെയ്തില്ലെങ്കിൽ ഏപ്രിൽ 1 മുതൽ  പാൻ കാർഡ് പ്രവർത്തനരഹിതമാകുമെന്നും നിർദേശമുണ്ട്. 

2)മ്യൂച്വൽ ഫണ്ട് നോമിനി
മ്യൂച്വൽ ഫണ്ടുകളിൽ നിക്ഷേപിക്കുന്നവർ മാർച്ച് 31-നകം നാമനിർദ്ദേശം സമർപ്പിക്കേണ്ടത് നിർബന്ധമാണ്. സമയപരിധി കഴിഞ്ഞിട്ടും ഈ മാനദണ്ഡം പാലിക്കാത്ത നിക്ഷേപകരുടെ നിക്ഷേപം മരവിപ്പിക്കും. പിന്നീട് ഇവർക്ക് അവയിൽ ഇടപാട് നടത്താൻ കഴിയില്ല.

3)സെക്ഷൻ 80 സി പ്രകാരം നികുതി ഇളവ്
സെക്ഷൻ 80C പ്രകാരം നികുതി ഇളവുകൾ ലഭിക്കുന്ന ഒട്ടേറെ നിക്ഷേപങ്ങളുണ്ട്. ഇവയിൽ നിക്ഷേപിക്കാൻ ആഗ്രഹമുള്ളവർ മാർച്ച് 31-ന് മുൻപ് നിക്ഷേപിക്കണം. നികുതി ഇളവ് ലഭിക്കുന്നതിന് വേണ്ടി പിപിഎഫ്, സുകന്യ സമൃദ്ധി യോജന, ഇ എൽ എസ് എസ് തുടങ്ങിയവയിൽ നിക്ഷേപിക്കാം. 

4)പ്രധാനമന്ത്രി വയ വന്ദന യോജന
ഒരു ഇൻഷുറൻസ് പോളിസി കൂടിയായ പെൻഷൻ പദ്ധതിയാണ് പ്രധാനമന്ത്രി വയ വന്ദന യോജന (PMVVY). ഒരാൾക്ക് 15 ലക്ഷം രൂപ പദ്ധതിയിൽ നിക്ഷേപിക്കാം. നിലവിൽ മുതിർന്ന പൗരന്മാർക്ക് പ്രതിവർഷം 7.40% പലിശയിൽ സ്ഥിര വരുമാനം ഈ പദ്ധതി പ്രകാരം ലഭിക്കും. 2023 മാർച്ച് 31 വരെ മാത്രമേ ഈ പദ്ധതിയിൽ നിക്ഷേപം നടത്താൻ കഴിയൂ. 

5)എൽഐസി പോളിസി
ഉയർന്ന പ്രീമിയം എൽഐസി പോളിസിയിൽ നികുതി ഇളവ് ലഭിക്കണമെങ്കിൽ, മാർച്ച് 31-ന് മുമ്പായി പോളിസി വാങ്ങണം. 2023 ഏപ്രിൽ 1 മുതൽ ഈ ഇളവ് ലഭ്യമാകില്ല