ഇൻഷുറൻസ് മേഖലയിലെ സാമ്പത്തിക ഇടപാടുകളിൽ സുതാര്യത ഉറപ്പുവരുത്തുന്നതിനായി നിർണ്ണായക നീക്കവുമായി കുവൈത്ത് ഇൻഷുറൻസ് റെഗുലേറ്ററി യൂണിറ്റ്. ഇൻഷുറൻസ് കമ്പനികളുമായുള്ള എല്ലാത്തരം സാമ്പത്തിക ഇടപാടുകളും ഇനി മുതൽ ബാങ്ക് വഴിയോ അംഗീകൃത ഇലക്ട്രോണിക് പേയ്‌മെന്റ് സംവിധാനങ്ങൾ വഴിയോ മാത്രമേ നടത്താവൂ എന്ന് അധികൃതർ വ്യക്തമാക്കി. ഉപഭോക്താക്കളിൽ നിന്ന് നേരിട്ട് പണം സ്വീകരിക്കുന്നത് പൂർണ്ണമായും നിരോധിച്ചു.

രാജ്യത്തെ സാമ്പത്തിക സുരക്ഷ ശക്തമാക്കുന്നതിനും ഡിജിറ്റൽ പരിവർത്തനം വേഗത്തിലാക്കുന്നതിനുമാണ് ഈ പുതിയ മാറ്റം കൊണ്ടുവന്നിരിക്കുന്നത്. സെൻട്രൽ ബാങ്ക് ഓഫ് കുവൈത്ത് അംഗീകരിച്ചിട്ടുള്ള ബാങ്കിംഗ് ചാനലുകൾ വഴി മാത്രമേ പ്രീമിയം അടയ്ക്കുന്നതും മറ്റ് തുകകൾ കൈപ്പറ്റുന്നതും നടക്കാൻ പാടുള്ളൂ എന്ന് പുതിയ നിയമം അനുശാസിക്കുന്നു. എന്നാൽ, അതിർത്തി കടന്നെത്തുന്ന വാഹനങ്ങൾക്കുള്ള നിർബന്ധിത ഇൻഷുറൻസ് രേഖകൾക്ക് ഈ നിയമത്തിൽ ഇളവ് നൽകിയിട്ടുണ്ട്. അതിർത്തിയിലെ പ്രത്യേക സാഹചര്യം പരിഗണിച്ചാണ് ഈ തീരുമാനം. ഏപ്രിൽ 22 മുതൽ പുതിയ നിയമം പ്രാബല്യത്തിൽ വന്നു.

ഇൻഷുറൻസ് മേഖലയിലെ നേരിട്ടുള്ള പണമിടപാടുകൾ ഇല്ലാതാക്കുന്നതിലൂടെ അഴിമതിയും കള്ളപ്പണം വെളുപ്പിക്കലും തടയാൻ സാധിക്കുമെന്നാണ് അധികൃതർ കണക്കാക്കുന്നത്. നിയമം ലംഘിക്കുന്ന കമ്പനികൾക്കും വ്യക്തികൾക്കും എതിരെ കടുത്ത നിയമനടപടികൾ സ്വീകരിക്കുമെന്ന് റെഗുലേറ്ററി യൂണിറ്റ് മുന്നറിയിപ്പ് നൽകി. കള്ളപ്പണം വെളുപ്പിക്കൽ തടയുന്നതിനുള്ള മറ്റ് കർശന നിയമങ്ങളും ലംഘകർക്കെതിരെ പ്രയോഗിക്കും. ഇൻഷുറൻസ് മേഖലയെ ഡിജിറ്റൽ സൗഹൃദമാക്കുന്നതിലൂടെ ഇടപാടുകാർക്ക് കൂടുതൽ സുരക്ഷയും വിശ്വാസ്യതയും ഉറപ്പാക്കാൻ സാധിക്കുമെന്നാണ് അധികൃതരുടെ വിലയിരുത്തൽ.