യുക്രൈൻ നടത്തിയ ഡ്രോൺ ആക്രമണങ്ങളെത്തുടർന്നുണ്ടായ ആഭ്യന്തര ഇന്ധനക്ഷാമം പരിഹരിക്കാനായി ഇന്ത്യയിൽ നിന്ന് പെട്രോൾ ഇറക്കുമതി ചെയ്യാൻ ആരംഭിച്ച് റഷ്യ. റഷ്യയിലെ ഊർജ്ജ പശ്ചാത്തല സൗകര്യങ്ങൾക്കും എണ്ണ ശുദ്ധീകരണ ശാലകൾക്കും (Refineries) നേരെ യുക്രൈൻ നടത്തിയ തുടർച്ചയായ ഡ്രോൺ ആക്രമണങ്ങളാണ് റഷ്യയെ പ്രതിസന്ധിയിലാക്കിയത്. ഇതേത്തുടർന്ന് റഷ്യയിലുടനീളം ഇന്ധനക്ഷാമം നേരിടുകയും പെട്രോൾ പമ്പുകളിൽ നീണ്ട ക്യൂവിനും വിലക്കയറ്റത്തിനും ഇത് കാരണമായതായും റോയിട്ടേഴ്സ് റിപ്പോർട്ട് ചെയ്യുന്നു.

പ്രതിസന്ധി മറികടക്കാൻ ഇന്ത്യ ഇതിനകം തന്നെ കുറഞ്ഞത് 60,000 മെട്രിക് ടൺ പെട്രോൾ രണ്ട് കപ്പലുകളിലായി റഷ്യയിലേക്ക് അയച്ചുകഴിഞ്ഞു. ഇന്ത്യൻ നിരക്കുകൾക്ക് അനുസൃതമായി ഇന്ധന ഇറക്കുമതിക്ക് സബ്‌സിഡി നൽകുന്നതിനായി റഷ്യ അവരുടെ നികുതി നിയമങ്ങളിൽ ഭേദഗതി വരുത്തിയതായി ടൈംസ് ഓഫ് ഇന്ത്യ റിപ്പോർട്ട് ചെയ്തു. ഇന്ത്യയെ കൂടാതെ അയൽരാജ്യമായ ബെലാറസിൽ നിന്നടക്കം പ്രതിമാസം 400,000 ടൺ പെട്രോൾ ഇറക്കുമതി ചെയ്യാനാണ് റഷ്യ ലക്ഷ്യമിടുന്നത്.

റഷ്യൻ ക്രൂഡ് ഓയിൽ ഇറക്കുമതി കൂട്ടി ഇന്ത്യ

റഷ്യയിലേക്ക് ശുദ്ധീകരിച്ച പെട്രോൾ കയറ്റുമതി ചെയ്യുന്നതിനൊപ്പം തന്നെ, ഇന്ത്യ റഷ്യയിൽ നിന്നുള്ള ക്രൂഡ് ഓയിൽ (കച്ചി എണ്ണ) ഇറക്കുമതി റെക്കോർഡ് അളവിലേക്ക് വർദ്ധിപ്പിച്ചു. ജൂൺ മാസത്തിൽ പ്രതിദിനം ഏകദേശം 2.70 ദശലക്ഷം ബാരൽ റഷ്യൻ എണ്ണയാണ് ഇന്ത്യ ഇറക്കുമതി ചെയ്തത്. ഇതോടെ ജൂണിൽ ഇന്ത്യയുടെ ആകെ എണ്ണ ഇറക്കുമതിയുടെ പകുതിയിലധികവും റഷ്യയിൽ നിന്നായി മാറി. മെയ് മാസത്തിൽ ഇത് 36.5 ശതമാനമായിരുന്നു. ഹോർമൂസ് കടലിടുക്കിലെ സംഘർഷങ്ങളെത്തുടർന്നുണ്ടായ വിതരണ തടസ്സങ്ങൾ കുറയ്ക്കാൻ ഇന്ത്യൻ കമ്പനികൾ റഷ്യൻ എണ്ണയെ കൂടുതൽ ആശ്രയിച്ചതാണ് ഈ റെക്കോർഡ് വർദ്ധനവിന് കാരണമായത്.