സൗദി അറേബ്യ ഉൾപ്പെടെയുള്ള ഏഴ് ഒപെക് പ്ലസ് രാജ്യങ്ങൾ അടുത്ത മാസം മുതൽ എണ്ണ ഉൽപ്പാദനം വർധിപ്പിക്കാൻ തീരുമാനിച്ചു. ആഗോള വിപണിയിലെ സാഹചര്യങ്ങൾ മെച്ചപ്പെട്ട പശ്ചാത്തലത്തിൽ, പ്രതിദിനം 1.88 ലക്ഷം ബാരൽ അധികമായി ഉൽപ്പാദിപ്പിക്കാനാണ് ധാരണയായിരിക്കുന്നത്. ആഗോള എണ്ണവിലയിൽ സ്ഥിരത ഉറപ്പാക്കുന്നതിനും വിപണിയിലെ അമിത വിതരണം നിയന്ത്രിക്കുന്നതിനുമായി ഏർപ്പെടുത്തിയിരുന്ന കർശനമായ ഉൽപ്പാദന നിയന്ത്രണങ്ങളിൽ ഇതോടെ അയവ് വരും.

സൗദി അറേബ്യ, റഷ്യ, ഇറാഖ്, കുവൈത്ത്, കസാഖ്സ്ഥാൻ, അൾജീരിയ, ഒമാൻ എന്നീ രാജ്യങ്ങളാണ് ഉൽപ്പാദനം വർധിപ്പിക്കാൻ മുന്നിട്ടിറങ്ങുന്നത്. ഓഗസ്റ്റ് മാസം മുതലാണ് ഈ തീരുമാനം പ്രാബല്യത്തിൽ വരിക. വിപണിയിലെ ഡിമാൻഡ് അനുസരിച്ച് ഉൽപ്പാദനം ക്രമീകരിക്കാനും, വർധന താൽക്കാലികമായി നിർത്തിവെക്കാനോ അല്ലെങ്കിൽ വീണ്ടും കുറയ്ക്കാനോ അതത് രാജ്യങ്ങൾക്ക് പൂർണ്ണ അധികാരം ഉണ്ടായിരിക്കും. വിപണി സാഹചര്യം നിരന്തരം നിരീക്ഷിച്ച് ആഗോള എണ്ണവിപണിയുടെ സ്ഥിരത ഉറപ്പാക്കുകയാണ് ഈ നടപടിയിലൂടെ ഒപെക് പ്ലസ് ലക്ഷ്യമിടുന്നത്.