മലബാറിലൊക്കെ കിട്ടുന്ന ഒരു സ്നാക്ക്സ് വളരെ എളുപ്പത്തിൽ നമുക്ക് തയ്യാറാക്കാം. രുചികരമായ ഒരു മലബാർ ബീഫ് പത്തിരി ആണിത്.

അതിനായി ആവശ്യം വേണ്ട ചേരുവകൾ

ബീഫ് – അര കിലോ
സവാള – 2 എണ്ണം
പച്ചമുളക് – 4 എണ്ണം
ഇഞ്ചി, വെളുത്തുള്ളി ചതച്ചത് – അര ടീ സ്പൂൺ
മഞ്ഞൾ പൊടി -അര ടീ സ്പൂൺ
മുളക് പൊടി – 1 ടീ സ്പൂൺ
ഗരം മസാല പൊടി – 1 ടീ സ്പൂൺ
കുരുമുളക് പൊടി – അര ടീ സ്പൂൺ
മല്ലി ഇല അരിഞ്ഞത് – കാൽ കപ്പ്
കറിവേപ്പില – 1 തണ്ട്
വെളിച്ചെണ്ണ – ആവശ്യത്തിന്
ഉപ്പ്‌ – ആവശ്യത്തിന്
മുട്ട – 2 എണ്ണം
മൈദ – 1 കപ്പ്
ഓയിൽ – ആവശ്യത്തിന്
പഞ്ചസാര – 2 ടീ സ്പൂൺ

തയാറാക്കുന്നതിനായി ബീഫ് നന്നായി കഴുകി വൃത്തിയാക്കി മഞ്ഞള്‍പൊടി, കുരുമുളക്‌പൊടി, ഉപ്പ് , മുളക് പൊടി, ഗരം മസാല എന്നിവ ചേര്‍ത്ത് വേവിക്കുക. ശേഷം മിക്സിയിൽ ഇട്ട് ഒന്ന് കറക്കി എടുക്കുക. ഒരു പാനിൽ വെളിച്ചെണ്ണ ഒഴിച്ച് ചൂടാക്കി ഇഞ്ചി, വെളുത്തുള്ളി ചതച്ചത് വഴറ്റുക. സവാള, പച്ചമുളക് ചേർത്ത് വഴറ്റുക. ഇതിലേക്ക് ബാക്കി ഉള്ള മഞ്ഞൾ പൊടി, മുളക് പൊടി, കുരുമുളക്‌ പൊടി, ഗരംമസാല, ഉപ്പ്, മല്ലിയില, കറിവേപ്പില എന്നിവയും ചേര്‍ത്ത് നന്നായി വഴറ്റിയെടുക്കുക. വേവിച്ചു വെച്ച ബീഫ് ചേര്‍ത്ത് യോജിപ്പിക്കുക.

മൈദയും ഉപ്പും കുറച്ച് വെള്ളവും ചേര്‍ത്ത് ചപ്പാത്തി മാവ് പോലെ കുഴച്ചെടുക്കുക. ചെറിയ ഉരുളകൾ ആക്കി പൂരിയുടെ വലുപ്പത്തിൽ പരത്തുക. ഒരു പൂരി എടുത്തു അതിന്റെ നടുവിൽ കുറച്ചു ബീഫ് മസാല വെക്കുക. മുകളിൽ ഒരു പൂരി കൂടി വെച്ച് സൈഡ് നന്നായി ഒട്ടിച്ച് മടക്കി എടുക്കുക. ശേഷം ചൂടായ എണ്ണയിൽ ഇട്ട് വറുത്തെടുക്കുക. ഒരു പാത്രത്തില്‍ മുട്ടയും, ലേശം പഞ്ചസാരയും ചേര്‍ത്ത് നന്നായി ബീറ്റ് ചെയ്യുക. ഒരു പാനിൽ 1 ടീ സ്പൂൺ നെയ്യ് അല്ലെങ്കിൽ എണ്ണ ഒഴിക്കുക. വറുത്തു വെച്ചിരിക്കുന്ന ഓരോ ഇറച്ചി പത്തിരി മുട്ടയിൽ മുക്കി ഒന്നുകൂടി തവയിൽ ഇട്ട് മൂപ്പിച്ച് എടുക്കുക.