ഇന്ത്യക്കകത്ത് ഡൊമസ്റ്റിക്ക് യാത്രകൾക്ക് പോകുമ്പോൾ ക്യാബിൻ ബാഗിനകത്ത് അനുവദനീയമായതും കൊണ്ടുപോകാൻ പാടില്ലാത്തതുമായ നിരവധി ഭക്ഷണ സാധനങ്ങളുണ്ട്. അനുവദനീയമായ ഇനങ്ങളിൽ സാധാരണയായി നട്‌സ്, ബിസ്‌ക്കറ്റ്, ചിപ്സ്, വാഴപ്പഴം, ആപ്പിൾ തുടങ്ങിയ പഴവർഗങ്ങൾ പോലുള്ള ഉണങ്ങിയ ലഘുഭക്ഷണങ്ങൾ ഉൾപ്പെടുന്നു. കുപ്പിവെള്ളം, ശീതളപാനീയങ്ങൾ തുടങ്ങിയ സീൽ ചെയ്ത പാനീയങ്ങളും നിഷ്‌കർഷിച്ചിരിക്കുന്ന അളവിൽ കൊണ്ടുപോകാം. 

എന്നാൽ, യാത്രക്കാരുടെ സുരക്ഷയും വിമാനത്തിനുള്ളിലെ ശുചിത്വവും കണക്കിലെടുത്ത് ചില ഭക്ഷണങ്ങൾ നിരോധിച്ചിരിക്കുന്നു. കറികളും ഗ്രേവികളും സൂപ്പുകളും തൈരും സോസുകളും പോലുള്ള, ദ്രാവകങ്ങളോ അർദ്ധ ദ്രാവകങ്ങളോ ആയ വസ്തുക്കൾ ഇങ്ങനെ കൊണ്ടുപോകാൻ പാടില്ലാത്തതാണ്. കൂടാതെ, അസംസ്‌കൃത മാംസം, സമുദ്രവിഭവങ്ങൾ, പാലുൽപ്പന്നങ്ങൾ എന്നിവ പോലുള്ള പെട്ടെന്ന് കേടാവുന്ന ഭക്ഷണങ്ങളും പൊതുവെ അനുവദനീയമല്ല.

ആഭ്യന്തരവിമാനയാത്രകളിൽ ക്യാബിൻ ബാഗിൽ കൊണ്ടുപോകാൻ അനുവദനീയമല്ലാത്തതും കൂടെ കൊണ്ടുപോകാവുന്നതുമായ ഭക്ഷ്യവസ്തുക്കളെക്കുറിച്ച് അറിയാം.

മധുരപലഹാരങ്ങളും കേക്കുകളും
യാത്രകൾ ചെയ്യുന്ന സമയത്ത് പ്രിയപ്പെട്ടവർക്കായി മധുരപലഹാരങ്ങളും ചോക്ലേറ്റുമെല്ലാം വാങ്ങുന്നത് സാധാരണയാണ്. എന്നാൽ, ഡ്രൈ ആയിട്ടുള്ള കേക്കുകൾ മാത്രമേ ഇങ്ങനെ അനുവദിക്കൂ എന്ന കാര്യം ശ്രദ്ധിക്കുക. അലിഞ്ഞുപോകുന്ന തരം കേക്കുകൾ, മിഠായികൾ എന്നിവ പറ്റില്ല.

ക്യാൻഡ്, പാകം ചെയ്ത ഭക്ഷണങ്ങൾ
ക്യാനിൽ ഉള്ളതോ അല്ലെങ്കിൽ പാകം ചെയ്തതോ ആയ ഭക്ഷണ സാധനങ്ങളുടെ പരമാവധി 100 മില്ലി മാത്രമേ ബാഗേജിൽ പാടുള്ളൂ. ഇവ ഒരു പ്ലാസ്റ്റിക് ബാഗിൽ നന്നായി പാക്ക് ചെയ്യേണ്ടതുണ്ട്. ജാം, ന്യൂട്ടല്ല മുതലായവ ചില വിമാനങ്ങളിൽ അനുവദനീയമാണ്. ഇവ കൊണ്ടുപോകാൻ ഉദ്ദേശമുള്ളവർ അതാതു വിമാന സർവീസുകളുടെ ലിസ്റ്റ് പരിശോധിക്കുക.

നെയ്യ്, ഓയിൽ
യാത്ര ചെയ്യുന്ന എയർലൈൻ അനുസരിച്ച് ഇതും മാറാം. ഇൻഡിഗോ പോലുള്ള വിമാനക്കമ്പനികൾ നെയ്യ് ചെക്ക്-ഇൻ ബാഗേജിൽ കൊണ്ടുപോകാൻ അനുവദിക്കുന്നു. എയർ ഇന്ത്യയിലാകട്ടെ, നെയ്യ് പരിമിതമായ അളവിൽ ചെക്ക് ഇൻ ലഗേജിലും ക്യാരി ബാഗിലും അനുവദനീയമാണ്. എന്നാൽ, എണ്ണ, എണ്ണമയമുള്ള ഭക്ഷണം എന്നിവ ഇൻഡിഗോ ഫ്‌ലൈറ്റിൽ കൊണ്ടുപോകുന്നത് പൂർണമായും നിരോധിച്ചിരിക്കുന്നു. അതേസമയം പരിമിതമായ അളവിൽ കൊണ്ടുപോകാൻ എയർ ഇന്ത്യ അനുവദിക്കുന്നു.

പഴങ്ങളും പച്ചക്കറികളും
സീസണൽ പഴങ്ങളും പച്ചക്കറികളും ഫ്രെഷായി നാട്ടിലെത്തിക്കാൻ ആഗ്രഹമുണ്ടോ? അങ്ങനെയുള്ളപ്പോൾ ക്യാരി ബാഗിൽ ഇവ കൊണ്ടുവരാം. നന്നായി പാക്ക് ചെയ്യണമെന്ന് മാത്രം. ഡ്രൈ ഫ്രൂട്‌സും കൊണ്ടുവരാം.

ബേബി ഫുഡ്
എയർ ഇന്ത്യ ഫ്‌ലൈറ്റിൽ ഒരു കൈക്കുഞ്ഞുമായി യാത്ര ചെയ്യുകയാണെങ്കിൽ, ക്യാരി-ഓൺ ബാഗിൽ ഭക്ഷണവും ഫീഡിംഗ് ബോട്ടിലുകളും കൊണ്ടുപോകാൻ അനുവാദമുണ്ട്. മിക്ക എയർലൈനുകളും സുരക്ഷയും എയർലൈൻ നിയന്ത്രണങ്ങളും അനുസരിച്ച് ചില ബേബി ഫുഡ് ഇനങ്ങൾ കൊണ്ടുപോകാൻ അനുവദിക്കുന്നു. എന്നാൽ, ഇവ സുതാര്യമായ പാത്രങ്ങളിൽ സൂക്ഷിക്കാൻ ശ്രദ്ധിക്കുക.

തേയില, കാപ്പിപ്പൊടി
ടീ ബാഗുകളും ചായപ്പൊടിയും കാപ്പിപ്പൊടിയും പോലുള്ളവ ക്യാബിൻ ബാഗിൽ കൊണ്ടുപോകാം.

ചീസ്
കട്ടിയുള്ള ഭക്ഷണമായതിനാൽ, ചീസ് ഹാൻഡ് ലഗേജിൽ കൊണ്ടുപോകാൻ കഴിയുന്ന ഒന്നാണ്.

മത്സ്യവും സീഫുഡും
എന്നാൽ മിക്ക എയർലൈനുകളും മത്സ്യം, സീഫുഡ്, അല്ലെങ്കിൽ ഏതെങ്കിലും തരത്തിലുള്ള മാംസം എന്നിവ വിമാനത്തിൽ കൊണ്ടുപോകുന്നത് വിലക്കുന്നുണ്ട്. ഉണക്കിയതോ പാകം ചെയ്തതോ ഫ്രീസ് ചെയ്തതോ ആയ മത്സ്യവിഭവങ്ങൾക്ക് ഇത് ബാധകമാണ്. ലഗേജിലും ഇത് കൊണ്ടുപോകാൻ അനുവാദമില്ല.

തേങ്ങ
തേങ്ങയുടെ മാംസളമായ ഭാഗത്ത് ഗണ്യമായ അളവിൽ എണ്ണ അടങ്ങിയിട്ടുണ്ട്, ഉയർന്ന താപനിലയിൽ ഇത് കത്താൻ സാധ്യതയുണ്ട്. അതിനാൽ മിക്ക വിമാനങ്ങളിലും ചെക്ക്-ഇൻ ബാഗേജിൽ  ഉണങ്ങിയ തേങ്ങ, കൊപ്ര എന്നിവ കൊണ്ടുപോകാൻ അനുവദിക്കാറില്ല. എയർ ഇന്ത്യ പച്ച തേങ്ങ ചതച്ചത് ചെക്ക് ഇൻ ലഗേജിലും ക്യാരി ഓൺ ബാഗിലും കൊണ്ടുപോകാൻ അനുവാദം നൽകുന്നുണ്ട്.

അച്ചാർ
വീട്ടിൽ നിന്നു ദൂരെ പോകുമ്പോൾ കണ്ണിമാങ്ങ അച്ചാറും മീനച്ചാറുമൊക്കെ കൊണ്ടു പോകാൻ തോന്നിയേക്കാം. എന്നാൽ, ഇവയൊന്നും എല്ലാ വിമാനങ്ങളിലും കൊണ്ടുപോകാൻ പറ്റില്ല എന്ന കാര്യം ശ്രദ്ധിക്കുക. എയർ ഇന്ത്യയിൽ അച്ചാർ കൊണ്ടുപോകാം, എന്നാൽ ചില്ലി അച്ചാർ ചെക്ക്-ഇൻ ബാഗേജിൽ മാത്രമേ അനുവദിക്കൂ.

സുഗന്ധവ്യഞ്ജനങ്ങൾ
എയർ ഇന്ത്യ വിമാനത്തിൽ ക്യാരി ഓൺ ബാഗിൽ സുഗന്ധവ്യഞ്ജനങ്ങൾ അനുവദനീയമല്ല, എന്നാൽ ചെക്കിൻ ബാഗിൽ കൊണ്ടുപോകാം. മറ്റേതെങ്കിലും എയർലൈൻ വഴിയാണ് യാത്ര ചെയ്യുന്നതെങ്കിൽ, അവരുടെ നിയമങ്ങളും നിയന്ത്രണങ്ങളും മുൻകൂട്ടി പരിശോധിക്കുന്നത് ഉറപ്പാക്കുക.

ബിരിയാണി
ഇൻഡിഗോ വിമാനത്തിൽ ബിരിയാണി കൊണ്ടുപോകാൻ അനുവാദമുണ്ട്. ഇവ നന്നായി പൊതിയണം എന്ന് മാത്രം.

മദ്യം, വെള്ളം
ഇൻഡിഗോ വിമാനത്തിൽ 100 മില്ലി വരെ അളവിൽ വെള്ളക്കുപ്പികളും എയ്‌റേറ്റഡ് ഡ്രിങ്കുകളും കൊണ്ടുപോകാം. അതേപോലെ തേനും 100 മില്ലി വരെ കൊണ്ടുപോകാം. എയർ ഇന്ത്യ വിമാനത്തിൽ ഒരു വ്യക്തിക്ക് ചെക്കിൻ ലഗേജിൽ മൊത്തം 5 ലിറ്റർ മദ്യം കൊണ്ടുപോകാം. കുപ്പി യഥാർഥ റീട്ടെയിൽ പാക്കേജിങ്ങിലായിരിക്കണം, കൂടാതെ ആൽക്കഹോൾ കണ്ടൻറ് 24% മുതൽ 70% വരെ ആയിരിക്കണം.