ബീഫ് ഇഷ്ട്ടപ്പെടാത്ത മലയാളികൾ കുറവായിരിക്കും. ബീഫ് കറി, ബീഫ് വരട്ടിയത്, ബീഫ് ഫ്രൈ, ബീഫ് മപ്പാസ്, അങ്ങനെ നീളും ബീഫ് വിഭവങ്ങൾ. നല്ല നടൻ രുചിയിൽ ഉണ്ടാക്കുന്ന ബീഫ് കറി ചോറിന്റെ കൂടെയും ചപ്പാത്തി പൊറോട്ട തുടങ്ങിയവയുടെ കൂടെയും ഒക്കെ കഴിക്കാൻ വളരെ നല്ലതാണ്. വീട്ടിൽ എങ്ങനെ എളുപ്പത്തിൽ നല്ല നാടൻ ബീഫ് കറി ഉണ്ടാക്കിയാലോ?

ചേരുവകൾ :

ബീഫ്- 1 കിലോ
സവാള – 4 എണ്ണം
വെളുത്തുള്ളി -3 എണ്ണം
പച്ചമുളക് – 6 എണ്ണം
തക്കാളി- 2 എണ്ണം
ഇഞ്ചി – 1
കറിവേപ്പില – 4 തണ്ട്
മുളകുപൊടി-2 ടേബിൾ സ്പൂൺ
മല്ലിപൊടി-2.5 ടേബിൾ സ്പൂൺ
മഞ്ഞൾപൊടി-1 ടേബിൾ സ്പൂൺ
മീറ്റ് മസാല- -2 ടേബിൾ സ്പൂൺ
പട്ട, ഗ്രാമ്പൂ, ഏലക്ക, കറുകയില- ആവശ്യത്തിന്
ഉപ്പ് – ആവശ്യത്തിന്
വെളിച്ചെണ്ണ – പാകത്തിന്
വെള്ളം – ആവശ്യത്തിന്

ഉണ്ടാക്കുന്ന വിധം:
ബീഫ് നന്നായി കഴുകി വൃത്തിയാക്കി ചെറിയ കഷണങ്ങളായി മുറിച്ചെടുക്കണം. ശേഷം വെള്ളം നന്നായി കളഞ്ഞ് മാറ്റി വെയ്ക്കണം. മുളകുപൊടി, മല്ലിപൊടി, മഞ്ഞൾപൊടി, മീറ്റ് മസാല കടായിയിലിട്ട് ചൂടാക്കി മാറ്റി വെയ്ക്കാം. ശേഷം കടായിയിൽ വെളിച്ചെണ്ണ ഒഴിച്ച് ചൂടാകുമ്പോൾ പട്ട, ഗ്രാമ്പു, ഏലക്ക, കറുകയില എന്നിവ ഇട്ട് ഇളക്കാം.

ശേഷം ഇതിലേക്ക് ഇഞ്ചിയും പച്ചമുളകും ചേർത്ത് നന്നായിവഴറ്റുക. ഇത് നന്നായി മൂത്ത് വരുമ്പോൾ ചെറുതായി അരിഞ്ഞുവെച്ച സവാള ചേർത്തുകൊടുക്കണം. ഇത് നന്നായി വഴറ്റിയെടുത്ത് ഇതിലേയ്ക്ക് നേരെത്തെ ചൂടാക്കിവെച്ച മസാലപൊടികൾ എല്ലാം ഇട്ടു ഒന്നുകൂടി വഴറ്റി ബീഫും അതിനൊപ്പം തക്കാളിയും കറിവേപ്പിലയും ഉപ്പും ചേർത്ത് നന്നായി ഇളക്കുക. പാകത്തിന് വെള്ളവും ചേർത്തുവെച്ച് അടച്ചുവെച്ച് വേവിക്കുക. നന്നായി വെന്തുവരുമ്പോൾ കുറച്ചു എണ്ണയും കുറച്ച് കറിവേപ്പിലയും ചേർത്തു ഇളക്കാം.