ചരിത്രത്തിലാദ്യമായി 48 ടീമുകൾ പങ്കെടുക്കുന്ന 2026-ലെ ഫിഫ ലോകകപ്പിന്റെ വിജയകരമായ നടത്തിപ്പിനായി ഖത്തറിൽ നിന്നുള്ള വിദഗ്ദ്ധ സംഘത്തെ വടക്കേ അമേരിക്കയിലേക്ക് വിന്യസിച്ചു. ഖത്തർ സുപ്രീം കമ്മിറ്റി ഫോർ ഡെലിവറി ആൻഡ് ലെഗസിയും (SC) ഫിഫയും (FIFA) തമ്മിൽ ഒപ്പുവെച്ച അറിവും വൈദഗ്ധ്യവും കൈമാറുന്നതിനുള്ള നിർണ്ണായക ധാരണാപത്രത്തിന്റെ (MoU) ഭാഗമായാണ് ഈ നടപടി.

ദോഹയിൽ നടന്ന പ്രത്യേക ചടങ്ങിൽ സുപ്രീം കമ്മിറ്റി മാനേജിംഗ് ഡയറക്ടർ ഹസ്സൻ അൽ തവാദിയും ഫിഫ പ്രസിഡന്റ് ജിയാനി ഇൻഫാന്റിനോയും ചേർന്നാണ് ധാരണാപത്രത്തിൽ ഒപ്പുവെച്ചത്. 2022-ലെ ഖത്തർ ലോകകപ്പ്, 2021-ലെയും 2025-ലെയും ഫിഫ അറബ് കപ്പ്, 2025-ലെ ഫിഫ അണ്ടർ-17 ലോകകപ്പ് എന്നിവയുടെ വിജയത്തിന് പിന്നിൽ പ്രവർത്തിച്ച ഖത്തറിലെ മുൻനിര കായിക സംഘാടകരാണ് നിലവിൽ യുണൈറ്റഡ് സ്റ്റേറ്റ്സിലെയും കാനഡയിലെയും വിവിധ ആതിഥേയ നഗരങ്ങളിൽ ചുമതലയേറ്റിരിക്കുന്നത്.

വൈദഗ്ധ്യവും അനുഭവസമ്പത്തും കൈമാറും

ലോകത്തെ ഏറ്റവും മികച്ച ലോകകപ്പുകളിലൊന്നായി വിലയിരുത്തപ്പെടുന്ന 'ഖത്തർ 2022'-ൽ നിന്നുള്ള അനുഭവപാഠങ്ങൾ ഉൾക്കൊണ്ടാണ് ഈ ടീം പ്രവർത്തിക്കുക. ടൂർണമെന്റ് ഓപ്പറേഷൻസ്, ജീവനക്കാരുടെ സജ്ജീകരണം, ഫാൻ എൻഗേജ്‌മെന്റ്, സാങ്കേതിക നവീകരണങ്ങൾ തുടങ്ങിയ പ്രധാന മേഖലകളിൽ ഇവർ തങ്ങളുടെ വൈദഗ്ധ്യം ഉപയോഗപ്പെടുത്തും.

കൂടാതെ, സുപ്രീം കമ്മിറ്റിയിൽ നിന്നുള്ള രണ്ടാമതൊരു സംഘം ടൂർണമെന്റിൽ ഒരു നിരീക്ഷണ പരിപാടിയുടെയും ഭാഗമാകും. അതിർത്തികൾ പങ്കിടുന്ന ഒന്നിലധികം രാജ്യങ്ങൾ ചേർന്ന് നടത്തുന്ന ഇത്തരം വൻകിട കായിക മേളകളുടെ സംഘാടനം, അതിലെ വെല്ലുവിളികൾ, അവയെ വിജയകരമായി മറികടക്കേണ്ട രീതികൾ എന്നിവ അടുത്തറിയാൻ ഇത് സംഘത്തെ സഹായിക്കും.

ഖത്തറിന്റെ കായിക വൈദഗ്ധ്യത്തെയും അടിസ്ഥാന സൗകര്യങ്ങളെയും ഫിഫ പ്രസിഡന്റ് ജിയാനി ഇൻഫാന്റിനോ അഭിനന്ദിച്ചു. കായിക സൗകര്യങ്ങൾ, ഹോട്ടലുകൾ, എയർപോർട്ട്, ഗതാഗതം എന്നിവയ്ക്ക് പുറമെ മികച്ച മനുഷ്യവിഭവശേഷിയും ഖത്തർ കെട്ടിപ്പടുത്തിട്ടുണ്ടെന്നും ടൂർണമെന്റുകൾ തടസ്സമില്ലാതെ നടത്തുന്നതിൽ ഖത്തർ എപ്പോഴും അത്ഭുതപ്പെടുത്തിയിട്ടുണ്ടെന്നും അദ്ദേഹം കൂട്ടിച്ചേർത്തു. പശ്ചിമേഷ്യയിലെ ആദ്യ ലോകകപ്പായ ഖത്തർ 2022-ന് പുറമെ, എഎഫ്സി ഏഷ്യൻ കപ്പ് 2023, ഒരേ വർഷം മൂന്ന് ഫിഫ ടൂർണമെന്റുകൾ തുടങ്ങിയവ വിജയകരമായി പൂർത്തിയാക്കിയ ഖത്തർ, വരുന്ന നവംബർ 19 മുതൽ ഡിസംബർ 13 വരെ തുടർച്ചയായ രണ്ടാം ഫിഫ അണ്ടർ-17 ലോകകപ്പിനും ആതിഥേയത്വം വഹിക്കാൻ ഒരുങ്ങുകയാണ്.